Pannakaabsuelto dagiti akusado iti P10 Billion Pork Barrel Scam

pork barrel

ADDANTO ngata masentensiaan a prominente a sigud wenno agdama nga opisial ti gobierno a naidarum iti Plunder wenno Graft mainaig iti P10 Billion Pork Barrel Scam?

Agdudua dagiti umili a Pilipino no addanto pay maysa kadagiti sigud a senador, kongresista ken nangato nga opisial ti gobierno ti masentensiaan ken mabalud gapu iti nakaidarumanda a kaso a Plunder wenno Graft gapu ti pannakikumplotda iti P10 Billion Pork Barrel Scam kalpasan nga inabsuelto ti Sandiganbayan First Division ni Ex Senator Ramon “Bong” Revilla Jr. iti kaso a Plunder iti pannakagastos ti alokasionna iti Priority Development Assistance Fund.

Nakaskasdaaw ti pannakaabsuelto ni Revilla, ta nasentensiaan a mabalud ti sigud a Chief of Staff-na a ni Atty. Richard Cambe. Nasentensiaan pay a mabalud ni Janet Lim Napoles nga utek ti P10 Billion Pork Barrel Scam.

Iti kadagupan dagiti lima a mahistrado iti Sandiganbayan; tallo dagiti nangabsuelto ken ni Revilla, da Geraldine Econg, Edgardo Caldona, ken Georgina Hidalgo; dua met dagiti kimmontra iti desision, da Efren de la Cruz ken Maria Theresa Dolores Gomez-Estoesta.

Inikkan ti merito dagiti tallo a mahistrado a nangabsuelto ken ni Revilla ti depensa a napalsipikado ti pirma ti sigud a Senador babaen iti staff-na kadagiti dokumento a mangsuporta kadagiti illegal a transaksion iti pannakagasto ti alokasionna iti PDAF. Ngem sinupiat dayta dagiti dua a mahistrado a kimmontra ta nangalada ti signature specialist a nangamiris iti pirma ni Revilla kadagiti dokumento, ken napasingkedanda a pudno a pirma ti sigud a senador dagiti nakasurat kadagiti dokumento.

Nawayawayaanen ni Revilla kalpasan ti pannakabaludna iti Philippine National Police Custodial Center iti Camp Crame manipud pay idi 2014. Naimandar metten ti pannakayakar ni Napoles sadiay Correctional Institution for Women manipud iti Bureau of Jail Management and Penology Detention Center iti Camp Bagong Diwa, Bicutan; ken ni Cambe sadiay New Bilibid Prisons manipud iti PNP Custodial Center. Nasentensia da Cambe ken Napoles iti reclusion perpetua wenno pannakabalud iti saan a nasursurok ngem 40 a tawen.

Naidarum iti Plunder ni Revilla, kaduana da sigud a senador Juan Ponce Enrile ken Jinggoy Estrada gapu ti panagawatna iti kickback a P224 Million nga alokasionna iti PDAF a naigastos kadagiti bogus a proyekto ken non-government organizations idi senador pay laeng isuna. Manipud pay idi 2013, pinaglibakanen dagiti tallo a senador dagiti akusasion kadakuada. Impettengda a politically motivated dagiti darum kontra kadakuada ta adda idi oposision kabayatan ti termino ni Presidente Benigno Aquino III.

No man pay naabsuelton ni Revilla iti kaso a Plunder, sumangsango pay laeng iti kaso a Graft, ngem nakapagpiansan para iti temporario a wayawayana.

Impalgaken ni Prosecutor Mariter Santos ti pannakadismayana iti pannakaabsuelto ni Revilla gapu ta patienna a natibker dagiti impresentarda nga ebidensia kontra iti sigud a senador. Inrakuraken ni Deputy Special Prosecutor Manuel Soriano nga adalenda ti sumaruno nga addangda para iti kaso ni Revilla.

Adu dagiti masdaaw iti pannakaabsuelto ni Revilla no maibasar kadagiti testimonial, documentary and circumstancial evidences a naidatag iti Sandiganbayan, ta pasingkedanda a nakikumplot ni Revilla iti illegal a pannakaaramat ti pondona a PDAF.

Mairaman kadagiti ebidensia ket ti Anti-Money Laundering Council (AMLC) Report ta imparangna dagiti deposito iti banko ken investment ni Revilla, ti asawana a ni sigud a Cavite Representative ken agdama a Mayor Lani Mercado-Revilla ken dagiti annakda nga aggatad iti P87,626,587.63 manipud Abril 6, 2006 agingga iti Abril 28, 2010, a panawen a pannakausar ti alokasionna iti PDAF. Iti testimonia ti pork barrel scam whistleblower a ni Benhur Luy kas insuratna iti ledger a ni Revilla ket immawat ti komision ken rebates manipud kadagiti transaksionna iti PDAF ken ni Napoles kadagita a panawen.

Masdaaw dagiti eksperto iti linteg nga uray no naabsuelto ni Revilla ket nairaman a namandar a makipagbayad iti civil liabilities nga aggatad iti P124.5 Million. Maibasar iti linteg, agsingin ti criminal liability ken civil liability. No naabsuelto ti criminal liability ni Revilla, apay a namandar pay laeng nga agbayad iti civil liability?

Adu dagiti saan a mamati a saan nga ammo ni Revilla, ti inaramid ti staff-na a ni Cambe, ken saan a nairanud iti minilion a komision ken rebates manipud kadagiti transaksion ni Napoles manipud iti alokasionna iti PDAF iti adu a tawen a panagtakemna kas senador. No nagbasol ken nasentensiaan da Cambe ken Napoles, kasta met koma ni Revilla ta alokasionna iti PDAF ti nausar kadagiti illegal a transaksion.

Iti pannakaabsuelto ni Revilla, agamak dagiti umili a maipadanto met a mawaswas dagiti kaso da Enrile ken Estrada ken dadduma pay a sigud a nangato nga opisial a naidarum iti Plunder wenno Graft iti pannakainaigda iti P10 Billion Pork Barrel Scam. Amkenda a maabsuelto met laeng dagiti prominente a sigud a nangato nga opisial ti gobierno, ken maisakripisionto laengen dagiti staff-da.

Nagkas-ang a pasamak ta iti laksid nga agpapada a naidarum iti Plunder dagiti tallo a sigud a senador a da Revilla, Enrile ken Estrada, ket agpapadada met nga agtarigagay nga agsubli sadiay Senado iti daytoy masungad a May 13, 2019 Elections. Immunan a nakapagpiansa da Enrile ken Estrada ken nabayagen a nawayada nga agpaspasiar kadagiti nagduduma a paset ti pagilian para iti kandidaturada. Sumagmamano nga aldaw kalpasan laeng ti pannakawaswas ti kaso ni Revilla, nagsaknapen dagiti tarpaulin-na kadagiti igid dagiti kangrunaan a kalsada.

Nagrigat a panunoten nga adda pay laeng tured dagiti sigud nga opisial ti gobierno nga agpaikawes manen iti turay nga iti laksid a naaramidda nga instrumento iti pannakadispalko dagiti nagadu a pondo ti gobierno. Uray no naabsuelton ni Revilla, ken mawaswasto ti kaso da Enrile ken Estrada gapu ta awan ti umanay nga ebidensia ti pannakainaigda. Ngem napaneknekanen iti Sandiganbayan a ti PDAF ni Revilla ket nagastos kadagiti illegal a transaksion. No maabsueltonto dagiti kaso da Enrile ken Estrada, ken masentensiaanto met dagiti staff-da agraman ni Napoles, ipaneknekna ti panagbaybay-a dagiti sigud a senador kadagiti responsibilidadda a nangaywan kadagiti pondo a naitalek kadakuada. Iti kasta a panagserbida iti gobierno iti naglabas, adda pay kadi koma rupa ken karbenganda nga agserbi iti gobierno?

Para kadagiti managamiris a Pilipino, marigatanda a mangawat ti panagkandidato manen dagiti politiko a naidarum iti kaso a Plunder wenno Graft, ken naikulongen iti sumagmamano a tawen ta gapu iti dakes a sistema ti politika iti Pilipinas ket mabalin a makasublida iti turay ket maulitto manen ti pannakaibulsa dagiti adu a pondo ti gobierno a nagtaud iti buis dagiti tattao. #