Pannakaabusar ti GCTA Law

PANGDEPDEP kadi ti nabara a sentimiento dagiti adu nga umili iti pannakaikkat ni Nicanor Faeldon kas Director General ti Bureau of Corrections gapu ti kontrobersia ken anomalia iti panagbalin a benepisario ti Good Conduct Time Allowance Law wenno Republic Act 10592 dagiti balud wenno Persons Deprived of Liberty a nakaaramid kadagiti nadangkok a krimen?

Inikkat met laengen ni Presidente Rodrigo Duterte ni Faeldon iti puestona gapu iti nabara a pressure dagiti senador ken pribado nga umili kalpasan a nabulgar ti nailimed a release order para iti nasapsapa a pannakawayawaya ti convicted rapist – murderer a ni sigud a Calauan, Laguna Mayor Antonio Sanchez kas maysa kadagiti 11,000 a benepisario ti GCTA Law.

Nasentensiaan ni Sanchez ken innem a pasurotna iti pito a bilang ti Reclusion Perpetua (40 a tawen a pannakabalud) idi 1995 sadiay National Penitentiary – New Bilibid Prisons gapu iti panangrames ken pannakapapatay ni Mary Eileen Sarmenta, ken pannakapapatay ni Allan Gomez idi 1993. Agpada da Sarmenta ken Gomez nga estudiante ti University of the Philippines Los Baños. Nasentesiaan pay ni Sanchez iti sabali a dua a bilang ti Reclusion Perpetua gapu iti Double Murder case iti pannakapapatay idi 1991 dagiti agama a Nelson ken Richmond Peñaloza a lider dagiti kalabanna iti politika. Idi 1999, nagsaruno a kinanunongan ti Supreme Court dagiti sentensia ni Sanchez.

No makuenta ti pito a Reclusion Perpetua a sentensia ni Sanchez iti Sarmenta – Gomez Case ket dumanon koma iti 280 a tawen, ken mainayon iti 80 a tawen a sentensiana iti kaso dagiti agama Peñaloza, ket agdagup 360 a tawen. Ngem iti las-ud laeng iti 26 a tawen ni Sanchez iti pagbaludan, nawayawayaan koman no saan a nabulgar ken nagprotesta ti publiko ken sinuportaranda ti awag da Mrs. Maria Clara Sarmenta ken Mrs. Iluminada Gomez nga ina dagiti biktima ni Sanchez.

Kabayatan dagiti nagsasaruno nga aldaw nga imbestigasion ti Senate Blue Ribbon Committee ken Committee on Justice and Human Rights nga idauluan ni Senador Richard Gordon a nakapalutpotan da Faeldon, Justice Secretary Menardo Guevarra ken dagiti dadduma pay nga opisial ti BuCor ken Department of Justice, natakuatan nga idi Agosto 20, 2019 ket pinirmaanen ti Director General ti release order ni Sanchez. Naipalgak pay a saan a nagbayad iti nasurok a P12 Milion a danios ni Sanchez iti pamilia Sarmenta ken Gomez. Naduktalan pay nga addan nasurok a 1,700 a kombiktado a kriminal pakairamanan dagiti agarup 700 a nakaaramid iti nadangkok a krimen.

Mairaman kadagiti nawayawayaanen dagiti pimmatay ken nangrames kadagiti agkabsat a Jacqueline ken Maryjoy Chiong iti Cebu idi 1997, ken lima pay a balud a drug lord. Naduktalan pay nga adda dagiti nawayawayaan a kombiktado a balud uray kabayatan ti kaudian nga Election Period a maipawilen ti pannakaipaay ti parol, pardon wenno amin a wagas ti pannakaruk-at ti balud. Natratar pay dagiti mabalin a maaramid kadagiti nawayawayaanen a nakaaramid iti nadangkok a krimen ta mailabsing iti linteg ti nasapsapa a pannakaruk-atda. Adda metten rimmuar a testigo a nausar ti kuarta iti pannakaipaay ti GCTA kadagiti nawayawayaan a balud.

Kiniddaw dagiti adu a senador ti panaglusulos ni Faeldon gapu iti nagbiddutanna, ngem uray gayam ni Senador Ronald “Bato” de la Rosa a sigud a Chief ti Philippine National Police, ken dati a BuCor Director General sakbay ti panagkandidatona a senador, ket adu met dagiti nawayawayaan idi panawenna agraman ti ti maysa a convicted drug lord.

Kagiddan ti panangirakurak ni Presidente Duterte idi Setiembre 4, 2019 ti pannakaikkat ni Faeldon a BuCor Chief, minandarna dagiti nawayawayaan a nakombiktaran iti nadangkok a krimen a sumukoda kadagiti polis wenno military iti las-ud ti 15 nga aldaw ta no saan ket maibilangdan a pugante. Nayetnag pay ti reward – bounty money ti P1 Million ti kada maysa kadagitoy a nawayawayaan a balud. Addan dagiti simmuko a nasapsapa a nawayawayaan a balud. Ngem sumuko pay ngata amin dagitoy a nawayawayaan no ammoda a tungpal-biagdanto nga agikaro iti pagbaludan?

Iti press briefing ni Presidente Duterte, impalgakna nga ikkatennan ni Faeldon gapu iti saanna a panangtungpal iti bilinna a saanna a wayawayaan ni Sanchez gapu ti protesta dagiti adu nga umili. Saan met a nalawag ti sungbat ti Presidente iti saludsod ti media no dutokannanto manen ni Faeldon iti sabali a posision kalpasan ti pannakaikkatna a mangidaulo iti BuCor.

Adu dagiti umili ti komontra no madutokanto manen ni Faeldon iti sabali a posision iti gobierno ta kalpasan ti terminona kas Commissioner ti Bureau of Customs ket napasamak ti eskandalo ti pannakaiserrek ti P6.4 Billion ti balorna a shabu iti Manila Port manipud China, ngem imbes a naikkat, nayakar laeng kas Deputy Director iti Office of Civil Defense, sa iti BuCor idi naglusulos ni De la Rosa gapu iti panagkandidatona a senador.

Iti tunggal aldaw nga aglabas ken panagimbestigar ti Senado iti kaso ti GCTA, umad-adu dagiti matakuatan nga isyu agraman ti panangiyendorso ni Presidential Spokesman Salvador Panelo iti kaso ni Sanchez iti maseknan nga opisina, ken namindua a pannakipagkitana iti opisinana iti pamilia ti sigud a Mayor a nagpaayanna a Legal Counsel idi mabisbista pay laeng ti kasona. Ngem uray no kasta, dinependeran met ti Presidente ni Panelo ta kas abogado ket paset ti propesionda ti panangiyendorso ti kaso ti sinoman nga agpatulong kadakuada. Ngem ethical wenno maitutop kadi ti pannakibiang pay ni Panelo kas nangato nga opisial ti gobierno kas Presidential Spokesman iti kaso ni Sanchez?

Nagkas-ang ti pannakaaramat ti GCTA Law a ti panggepna ket maikkan ti gundaway dagiti balud a nakombiktaran kadagiti saan a nakaam-ames a kaso tapno agbalbaliw ken makadennada dagiti pamilia ken ipatpategda iti biag, ta naabusar daytoy a linteg ken naaramat a panguartaan dagiti rinuker nga opisial ti gobierno, ket nabenepisiaran dagiti addaan iti kinabaknang ken koneksion uray saanda a kualipikado.

Makadismaya met ti naikurimed a pannakawayawaya dagiti balud a nakaaramid kadagiti nakaam-ames a krimen agraman dagiti drug lord babaen kadagiti gobierno iti administrasion ti Presidente a mangipaspasindayag ti kampaniana ti pannakaparmek ti kurapsion, krimen ken illegal a droga. ●