Pannakabaliw ti gender, birth date, saanen a dumalan iti korte

CANDON CITY – Addan otoridad ti city wenno municipal registrar a mangkorehir kadagiti clerical wenno typographical errors iti aldaw ken bulan iti birth date wenno iti sex ti maysa a tao kas nailanad iti civil registerĀ  a saanen nga agdalan pay iti korte.

Kinuna ni Engineer John Loyac, Candon City Civil Registrar, bayat ti maysa a taripnong dagiti barangay kapitan ditoy siudad nga iti babaen ti RA No. 9048, naikkan dagiti civil registrars iti otoridad a mangkorehir iti clerical wenno typographical error ken mangbaliw iti first name wenno nickname iti maysa a tao a saanen nga agdalan pay iti korte.

Inlawlawag ni Loyac a naamendaran ti RA No. 9048 babaen ti RA No. 10172, ket naikalawa ti mabalinen aĀ  korehiren ti local civil registrar ta karamanen dagiti clerical wenno typographical errors iti aldaw ken bulan iti date of birth wenno sex ti maysa a tao a nailanad iti civil register a saanen a kasapulan ti pammilin manipud iti korte.

Nupay kasta, adda latta dagiti proseso a masurot iti panangkorehir dagiti biddut iti aldaw ken bulan ti birth date ken iti sex ti maysa a tao, kinuna ni Loyac.

Saan a karaman a saklaw ti RA 10172 ti pannakabaliw ti nationalidad, tawen, wenno estado ti petisioner no di ket agdalan dagitoy iti korte.

Kas sagudayen ti RA 10172, saan a maasikaso ti aniaman a petision para iti pannakakorehir ti erroneous entry mainaig iti date of birth wenno sex ti maysa a tao malaksid no adda kakuyog ti petision a nagkauna nga school record wenno nagkauna a dokumento iti pagadalan, kas iti medical records, baptismal certificate ken dadduma pay a dokumento nga inyisio dagiti religious authorities.

Kasta met a saan a makorehir ti aniaman nga entry mainaig iti pannakasukat ti gender malaksid no ti petision ket adda kakuyogna a sertipikasion manipud iti maysa nga accredited a government physician a mangpaneknek a saan a nagdalan ti petisioner iti sex change wenno sex transplant.

Kabayatanna, inlawlawag ti maysa pay a civil registrar a masapul a maipublikar ti petision para iti pannakasukat ti aldaw ken bulan iti date of birth wenno sex ti maysa a tao iti maminsan iti makalawas iti dua a nagsaruno a Domingo iti maysa a pagiwarnak nga agsirsirkulo (general circulation) iti probinsia. Adda bayadan ti petision a publication fee.

Innayonna nga adda fee a bayadan ti petisioner a kolektaan ti city wenno municipal civil registrar ket maipan daytoy iti pondo ti maseknan a Local Civil Registry Office wenno iti Opisina ti Consul General para iti modernisasion ti opisina wenno iti pannakayemplo dagiti baro a personnel wenno panaggatang kadagiti suplay, kas maibatay iti government accounting and auditing rules.

Kinuna ti nasao a civil registrar a tagtagiurayda laengen ti implementing rules and regulations ti RA 10172 tapno mayimplementardan ti linteg. (Karaman ti report ni Danny Antalan)