Footer

Pannakabomba balay ti agama, pinaimbestiga ti PNP provl director

BANTAY, Ilocos Sur – Imbilin ni Provincial Police Director Senior Superintendent George Regis iti polis ti Sta. Catalina iti panangiwayatda iti naan-anay nga inbestigasion mainaig iti pannakabomba ti maysa a pagtaengan iti barangay Suvec iti nadakamat nga ili.

Maysa a granada ti napabettak iti uneg ti pagtaengan ni Ferdinand Ricolcolin, 28, naasawaan, physical therapist, residente iti Suvec, Sta. Catalina, Ilocos Sur a nakadadaelan dagiti sumagmamano nga alikamenda.

Nagresponde dagiti polis iti nasao a lugar kalpasan a pinakaammuan ida ni Barangay Captain Claro Ragunjan mainaig iti nasao a panagbomba iti pagtaengan ti biktima.

Nupay kasta, saan a naan-ano da Ricolcolin ken ti anakna, ni John David, ta matmaturogda iti kuartoda idi bimtak ti bomba.

Iti pannakaisurat daytoy, saan pay nga ammo ti kinasiasino dagiti nagibato iti granada iti uneg ti pagtaengan ni Ricolcolin ken no ania ti motibo ti pammomba.

Linaon pay ti pammilin ni Regis ti panangidatag dagiti inbestigador iti reportda iti opisinana iti las-ud ti 24 nga oras.

Kabayatanna, maysa a barangay kagawad ti inaresto dagiti polis ti Santa, Ilocos Sur gapu iti panagpaputokna iti paltogna.

Nainaganan ti kagawad a ni  Samuel Batalla, naasawaan, residente iti Namalangan, Santa, Ilocos Sur.    

Segun iti report, madama ti panagpatrolia dagiti polis nga indauluan ni Police Inspector    Honesto Lazo, Sr. iti Namalangan, Santa idi makangegda iti putok ti paltog.

Iti panagrekorida dagiti polis, nasalamaanda ti kagawad a mapapati a nakainom nga adda ikutna  a paltog.

Maisagsaganan ti kaso a panaglabsing iti illegal a panagikut iti armas ken election ban maikontra iti nasao a barangay kagawad.