Footer

Pannakabuangay ti Bago province, nairiing

VIGAN CITY – Kinuna ni Vice Governor Jeremias “Jerry” Singson nga iti biangna, saan a kumporme iti gannuat a maipasdek ti maysa a probinsia manipud kadagiti upland municipalities iti Ilocos Sur.

“… No siak ti pagsaludsodam, kaykayatko (ngata) no adda third district. Saan koma a sumina iti probinsia dagiti upland (municipalities) nga agbalinda a maysa a probinsia,” kinuna ni Singson ken ni Jun Ramos bayat ti pannakiuman daytoy kenkuana a naipatangatang iti radio.

Naidanon itay nabiit iti sangguniang panlalawigan bayat ti sessionda ti awag kadagiti upland municipalities a mangsuporta iti pannakaipasdek ti maysa a probinsia dagiti Bago.

Maysa a resolusion ti indatag ni Mayor ti Suyo Elpidio Bistoyong iti hunta probinsial itay Enero 17 a panagsessionna a mangaw-awag kadagiti upland municipalities iti panangsuportada iti pannakaipasdek ti Bago province para iti pannakaidur-as dagiti il-ili nga adda iti kabambantayan.

Ngem kinuna da Bokal Robert Tudayan ken Bokala Rosario Gironella, agpada a nagtaud iti upland municipalities a masapul a maadal pay ti resolusion ken santo laeng mataming kalpasan ti pannakakonsulta amin dagiti agtuturay iti upland municipalities.

Iti napalabas, adda tignay a mangisina kadagiti upland municipalities nga agbalin a maikatlo a distrito ti Ilocos Sur ngem awan ti dimmur-asanna.

Kangrunaan nga areng-eng dagiti mangipagpagna iti gannuat iti pannakabuangay ti maikatlo a distrito a buklen dagiti upland municipalities ti kapaliiwan a nabuntog ti asenso dagitoy no maikumpara kadagiti il-ili iti patad.

Adda 14 nga upland municipalities a karaman iti maikadua a distrito ti Ilocos Sur.

Buklen ti 19 nga il-ili ti maisingsingasing a mangbukel iti kabarbaro a probinsia ti Kabagoan.  (Basaen ti salaysay iti panid 3 – Ed.) Karaman ditoy ti 14 nga interior nga ili ti Ilocos Sur kas iti  Cervantes, San Emilio, Quirino, Gregorio del Pilar, Lidlidda, Suyo, Sugpon, Sigay, Alilem, Burgos, Banayoyo, Salcedo, Nagbukel ken Galimuyod; ti Sudipen ken Bagulin iti La Union; ken ti ili ti Tubo, Luba ken Villaviciosa iti Abra.

Kinuna ni Singson nga “awan ti dakesna dagita nga arapaap wenno tagtagainep wenno gannuat”  ngem innayonna nga iti “numo toy biang laeng, mas kompurmeak koma no third district of Ilocos Sur ti upland municipalitiestayo.”

Kinuna ti bise gobernador nga adunto a panagsisinnukat iti kapanunotan ken panagiinnadal ti maiwayat mainaig iti nasao a resolusion.#