Footer

Pannakadutok ti baro a Chief Justice

ADDA pay ngata magapuanan ti baro a Chief Justice para ti pannakareporma ti hudikatora iti pagilian no agserbi laeng isuna iti las-ud ti 41nga aldaw?

Dayta ti nagkaykaysa a saludsod dagiti adu nga umili iti panangdutok ni Presidente Rodrigo R. Duterte ken ni sigud nga Associate Justice Teresita Leonardo – de Castro kas baro a Chief Justice a mangidaulo iti Korte Suprema ken dagiti amin a korte iti Pilipinas.

Dinutokan ni Duterte ni De Castro iti Supreme Court kas baro a Chief Justice kasukat ni sigud a Chief Justice Maria Lourdes Sereno a napadisi iti akemna babaen ti quo warranto petition a nangwaswas ti pannakapilina a mangidaulo ti Korte Suprema. Nadutokan ni De Castro kadagiti tallo nga inrekomenda ti Judicial Bar Council, agraman da Associate Justices Diosdado Peralta ken Lucas Bersamin. Agpapada dagitoy a tallo a pimmabor iti quo warranto petition kontra ken ni Sereno, ken nagparangda pay iti hearing ti Committee on Justice ti House of Representatives para ti Impeachemt Complaint a naipila ken ni Sereno.

Immunan a nagipila iti impeachment complaint ti Makabayan block iti House Representative nga idauluan ni Albay Rep. Edcel Lagman, kontra kadagiti tallo a nominado iti JBC, ken dadduma pay a Supreme Court justices a kimmanunong iti quo warranto petition kontra ken ni Sereno, tapno malapdanda iti pannakadutok ti maysa kadakuada kas Chief Justice. Ngem segun ken ni Justice Secretary Menardo Guevarra a kameng ti JBC ket awan ti epektona ti impeachment complaint iti appointment ni Sereno, ta saan nga administrative wenno criminal case ti naipila kadakuada.

Naglak-am iti nagduduma a kritisismo ti pannakadutok ni De Castro gapu ta kalpasan laeng iti 41 nga aldaw ket agretironton iti serbisio kalpasan ti 45 a tawen a panagserbina iti gobierno.

Inkari ni De Castro nga ababa ti panawen a panagserbina kas Chief Justice, ngem ikagumaanna nga iyusuat dagiti reporma ken gannuat a mangpadaras ti panagtaray ti hustisia iti pagilian babaen ti napartak a pannakaresolbar dagiti adu a kaso a nakapempen kadagiti nagduduma a korte. Inkarina ti reporma iti JBC tapno nasaysayudton ti pannakapili dagiti madutokan a Chief Justice ken justice iti Korte Suprema.

Adda dagiti kongresista a mangibilang a ti pannakadutok ni De Castro kas Chief Justice ket pakonsuelo wenno gunggonana iti pannakitimpuyogna a maikkat iti saad ni Sereno. Impalgak ni Magdalo Partylist Rep. Gary Alejano a ti panagakem ti baro a Chief Justice iti 41 nga aldaw ket nalawag a gunggona tapno maital-o ti saadna ken dakdakkel dagiti maawatna a benepisio iti panagretirona.

Maysa kadagiti kontrobersia a kaso a trataren ti Korte Suprema kabayatan ti ababa a panagakem ni De Castro kas Chief Justice ket ti oral argument iti panangibabawi ti gobierno ti Pilipinas iti pannakikaysana iti Rome Statute para ti International Criminal Court. Inkeddeng ni Duterte nga agikkat ti Pilipinas iti ICC kalpasan a naidarum isuna iti Crime Against Humanity gapu kadagiti adu a napapatay sadiay Davao City idi mayor pay laeng iti dayta a siudad, ken dagiti adu a natay iti nainget a kampania ti administrasion kontra illegal a droga.

Dinependeran ni Duterte iti panangdutokna ken ni De Castro kas baro a Chief Justice maibasar iti merito ken seniority a rebbengna a maadaptar kadagiti amin nga ahensia ti gobierno no dagiti agngayangay iti posision ket agpapada a kualipikado. Ngem praktikal kadi a madutokan pay a Chief Justice ni De Castro no agserbi laengen isuna iti las-ud ti 41 nga aldaw? Saan ngata a ti nabiit a panagserbi ni De Castro, ket kasla ipawaywayna laeng ti proseso ti pannakapili ti baro a Chief Justice. No kasta met laeng ti kapanunotan ti Presidente, saan ngata koma a nasaysayaat nga insanudna pay ti pannakapili ti baro a Chief Justice kabayatan nga agpapaay nga Officer In Charge ni Senior Associate Justice Antonio Carpio?

Iti pannakadutok ni De Castro maibasar iti seniority, ken agakem laeng a Chief Justice iti 41 nga aldaw, inrakuraken ni Carpio ti tarigagayna nga agpanominar iti posision apaman nga agretiro ti mangidaulo ti Supreme Court. Idi mapadisi ni Sereno a Chief Justice, saan a kinayat ni Carpio ti nagpainominar gapu iti delikadesa gapu iti panangkontrana iti quo warranto petition ken ni Sereno ta patienna nga impeachment laeng ti makaikkat iti Chief Justice kas maibasar iti 1987 Constitution. No agretironton ni De Castro, sumarunon ti nominasion ni Carpio, ket isunanton ti kasenioran kadagiti agngayangay a para Chief Justice. Ditanton a mapaneknekan ti kinapudno ni Duterte a kalaksidan iti merito, seniority ti pagbasaranna iti panangdutokna iti Chief Justice.

Ngem madutokanto ngata ni Carpio a Chief Justice ket nagadu dagiti desision ti Korte Suprema a kaso mainaig iti administrasion a saanna a kinanunongan. Mabigbig pay ni Carpio ti natibker a pagtaktakderanna maikontra iti China iti panangsakupda iti teritorio ti Pilipinas iti West Philippine Sea a kasupadi ti pammati ken addang ni Duterte. No saanto a dutokan ni Duterte a Chief Justice ni Carpio, paneknekanna a saan a pudno a merito ken seniority ti nagbasaranna iti panangdutokna ken ni De Castro a mangidaulo ti Korte Suprema.#