Footer

Pannakaibabawi ti amnestia ni Senator Antonio Trillanes IV

ITI umuna a gundaway iti pakasaritaan ti Pilipinas, naibabawi ti naipaay nga amnestia iti maysa a nagbasol iti linteg, ti pagpaspasaran ita ni Senador Antonio Trillanes IV.

Imbabawi ni Presidente Rodrigo Duterte babaen ti Proclamation 572 a napirmaan idi Agosto 31, 2018, ti amnestia a naipaay ken ni Trillanes idi 2011 babaen ken ni sigud a Presidente Benigno Aquino III gapu iti pannakairamanna iti Oakwood Mutiny idi 2003 ken Manila Peninsula Siege idi 2007.

Minandar ni Duterte idi Setiembre 4, 2018 ti Philippine National Police Criminal Investigation and Detection Group ken Armed Forces of the Philippines ti panangarestoda ken ni Trillanes, ken ti Departrment of Justice ti panangalada iti warrant of arrest iti Makati Regional Trial Court Branch 148 para kadagiti napagungar a kaso a rebellion kontra iti Senador.

Impatalged ni Senate President Vicente Sotto III a saanna nga ipalubos a maaresto ni Trillanes kabayatan a naka-session ti Senado, ken adda ti Senador iti uneg ti Senate Compound ta kalinteganna dayta kas pinasingkedan ti 1987 Constitution.

Nagsayaat ti pannakairanana a ti panagaresto koma ken ni Trillanes babaen kadagiti polis ken military ket nairana a ni Duterte ket adda iti opisial a panagbisitana sadiay Israel, ken kabayatan nga idadauluan ni Trillanes ti imbestigasion kas Chairman ti Committee on Civil Services  iti Senado ti kaso a “Conflict of Interest maikontra ken ni Solicitor General Jose Calida gapu ti panagtagikua ti pamiliana iti Vigilant Security and Investigation Agency a nakaala iti multi-million a kontrata iti DOJ ken dadduma pay nga ahensia ti gobierno.

Saan a nagpaaresto ni Trillanes ta awan ti warrant of arrest dagiti mangaresto kenkuana, ken patienna a saan a mabalin nga ibabawi ti amnestia a naipaay kenkuana idi 2011 ta tinungpalna amin dagiti documentary requirements nga ibagbaga ti DOJ a saanna nga impasa kas ti nanotaran nga aplikasionna para ti amnestia, ken panangaklonna iti basolna.    Imparangna pay dagiti ebidensia manipud kadagiti nagduduma a media outlets dagiti file photos ti panagipilana kadagiti kasapulan a dokumento idi nagaplikar iti amnestia. Impatangkenna met a saanen a mabalin nga arestaren nga awanan iti warrant of arrest tapno sumango iti Court Martial ti AFP kas Navy Lieutenant ta saanen a soldado isuna manipud pay idi 2007 a nagkandidato ken nangabak a senador.

Nakaskasdaaw a nagsayaat ti pannakairanana a ti panagaresto koma ken ni Trillanes babaen kadagiti polis ken military ket nairana a ni Duterte ket adda iti opisial a panagbisitana sadiay Israel, ken kabayatan nga idadauluan ni Trillanes ti imbestigasion kas Chairman ti Committee on Civil Services  iti Senado ti kaso a “Conflict of Interest maikontra ken ni Solicitor General Jose Calida gapu ti panagtagikua ti pamiliana iti Vigilant Security and Investigation Agency a nakaala iti multi-million a kontrata iti DOJ ken dadduma pay nga ahensia ti gobierno.

Inakusaran ni Trillanes a ni Calida ti utek ti pannakaibabawi ti amnestiana tapno mataktak ti imbestigasion iti kaso a Conflict of Interest kontra ti Solicitor General.  Pinaglibakan met ni Calida nga isuna ti akin-utek ti pannakaibabawi ti amnestia ni Trillanes. Impettengna a sanguen laengen ti Senador ti kasona nga immunan a rinepaso ti Office of the Solicitor General idi 2013.

Dinependeran met ni Senate Minority Floorleader Frank Drilon ni Trillanes nga illegal ti panangaresto iti Senador ta winaswasen ti RTC dagiti kaso a nakaidarumanna babaen ti pannakaipaay ti amnestia. Inlawlawagna a ti amnestia ket maysa a kompleto nga aramid ket saan a mabalin nga ibabawi.

Imparikna dagiti dadduma a senador iti oposision ken uray iti mayoria ti suporta ken pannakisimpatiada ken ni Trillanes. Impalgak ni Senate Pro Tempore Ralf Recto a rebbengna a maraem ti kalintegan ni Trillanes kas Senador a binutosan dagiti nasurok nga 11 million a Pilipino. Inrakurak met ni Senador Gregorio Honasan, sigud a lider dagiti napaay a kudeta idi termino ni Presidente Corazon Aquino, a nakagun-od iti amnestia idi tiempo ni Presidente Fidel Ramos, ta saan koma a mapilpili laeng dagiti pakapasamakan ti sagsagrapen ni Trillanes a naibabawi ti amnestiana.

Inrakurak ni Magdalo Partylist Representaive Gary Alejano, sigud a kadua ni Trillanes iti Oakwood Mutiny ken naikkan ti amnestia, a ti pannakaibabawi ti amnestia ken ni Trillanes ket maysa a political persecution wenno panagibales ken nairanta tapno pagulimeken dagiti kritiko ti Presidente ken ti oposision.

Inlawlawag ni Justice Secretary Menardo Guevarra nga awan ti marisna a politika ti pannakaibabawi ti amnestia ni Trillanes ngem kayat ti agdama nga administrasion a masurot ti umno a proseso ti hustisia. Inlawlawagna nga iti pannakawaswas ti amnestia ti Senador ket maituloy manen dagiti kaso a naipila iti RTC ken iti Military Court Martial.

Nakaskasdaaw ti pannakaibabawi ti amnestia ni Trillanes a maibilang a kapingetan a kritiko ni Duterte a nangakusar iti Presidente nga adda nalimed a depositona iti banko ket kinaritna nga agpirma iti waiver tapno masukisok ti bank account-na. Inyusuatna pay ti panagimbestigar ti Senado iti Presidente maainaig iti Davao Death Squad.

No matuloy a maaresto wenno sumuko ni Trillanes, duadanton a senador a mabalud, kaduananton ni Senador Leila de Lima a napinget met a kritiko ni Duterte. Nabalud ni De Lima gapu iti kaso ti pannakainaigna iti illegal a droga idi isuna pay ti Justice Secretary idi panawen ni Aquino.

Makaalarma dagitoy a pasamak ta kalpasan a napadisi ni sigud a Supreme Court Chief Justice Ma. Lourdes Sereno gapu iti impila a quo warranto petition ni Calida, ket itan maak-akusaran ti Solicitor General nga akin-utek iti pannakaibabawi ti amnestia ni Trillanes.

Dagitoy a pagteng ket iyanninawna ti tignay a mangpadisi kadagiti lapped ken kritiko ti administrasion. Nakalkaldaang dagitoy a pagteng ta mapaspasamakda kabayatan dagiti agrurutap a problema ti pagilian kangrunaanna ti panagrigat unayen dagiti umili aglalo dagiti napanglaw gapu iti nadagsen nga epekto ti panagbaba ti balor ti piso ken ti Tax Reform for Acceleration and Inclusion Law a nangpatayok ti presio dagiti kangrunaan a magatgatang kas ti makan, gasolina ken krudo, koriente ken dadduma pay a napateg a kasapulan dagiti umili. (Eden Alviar)