Pannakaibutaktak dagiti kongresista a mainaig iti anomalia

KADAGITI naglabas a tawen, maysa kadagiti pagilasinan ti kaasidegen ti Paskua ket ti nakaro a trapiko ken panagwarawara dagiti adu a katutubo kadagiti kalsada.

Maikatlon a lawas ti Disiembre, ngem nawaya latta dagiti kalsada kadagitoy a buya. Mapaliiw nga adu pay laeng a Pilipino dagiti kasla saan a magagaran nga asidegen nga aldaw ti Paskua gapu kadagiti sagsagabaenda a rigat ti panagbiag ken adu a pakakumikomanda iti inaldaw.

No awan koma ti pandemia ti Coronavirus 2019 kas kadagiti naglabas a tawen ket nangrugi koman ti Christmas rush kadagiti adu a malls, shopping centers ken pagtagilakuan nangruna kadagiti siudad a mangpakaro ti trapiko kadagiti kalsada. Adu koman dagiti katutubo a tattao a makipaskua wenno makilimos kadagiti kalsada. Awanen kadagiti kalsada dagiti adu nga ubbing ken katutubo a babbai nga ub-ubbada dagiti babassit nga annakda nga agdawat iti asi kadagiti tattao.

Mangrugi koman ita a lawas dagiti agsisimparat a padaya wenno Christmas party. Limitado ita a tawen dagitoy a tradision ken nakaugalian ta ipawil ti Inter-Agency Task Force for the Management of Infectious Diseases kas wagas tapno malapdan ti panagwaras ti Covid.

Uray no saan nga ipawil ti gobierno dagiti nagduduma nga aktibidad ita a panawen ti Paskua, dakkel ti pagdumaanda kadagiti naglabas a tawen gapu ti kinarigat ti biag a pinarnuay ti Covid 19 ken dagiti maipakpakat a community quarantine iti nagduduma a paset ti pagilian.

Adun dagiti nagserra a negosio keta du a mangmangged dagiti naawanan iti trabaho ken pagsapulan. Adu dagiti pribado a kompania uray no saanda a nagserra ket saanda a kabaelan ti mangted ti naipakadawyan a Christmas bonus, ken ti mandatory 13th month pay kas sagudayen ti Labor Code.

Adu nga overseas Flipino workers dagiti naawanan iti trabaho sadiay ballasiw-taaw dagiti napagawiden iti Pilipinas, ket nainayonda iti umad-adu a bilang dagiti napukawan iti pagsapulan. Nagangayanna, marigatan met dagiti pamilia nga agdepdepender kadagiti maipaw-it a tulong kadakuada.

Nagasat dagiti agserserbi iti gobierno ta agrurutap dagiti naawatda a benepisio ita a Paskua, nangruna dagiti nangato nga opisial ta saanda a naapektaran iti krisis nga impaay ti pandemia.

Narigat man ti kasasaad ita a Paskua dagiti napanglaw ita a tawen, ngem naindaklan a pagyamananda iti Dios ta nadanonda manen daytoy a tiempo. Saandan nga apalan dagiti nabaknang ken adu ti makukuartana ta saan nga agpapada iti kinagasat ti panagbiag. Mangnamnama ken ikagumaanda ketdi ti agsalukag.

Nakalkaldaang a pagteng a kabayatan a nagadu a napanglaw a Pilipino a naapektaran iti pandemia ken dagiti agsasaruno a didigra dagiti gumawgawawa iti ayuda iti gobierno ket agsasaruno met dagiti maipadpadamag a kurapsion kadagiti ahensia ti gobierno.

Kalaksidan kadagiti kontrobersia iti kurapsion iti Philippine Health Insurance Corporation iti naglabas nga inimbestigaran ti Senado ken naglusulosan dagiti nangato nga opisial, ket maysa manen a nabara nga isyu ti inrakurak a mismo ni Presidente Rodrigo Duterte nga agtultuloy a nakaro nga anomalia iti Department of Public Works and Higways. a pakainaigan dagiti dadduma a kongresista a mangal-ala iti kickbacks wenno porsiento kadagiti pondo dagiti proyekto kadagiti distritoda.

Inrakurak ti Presidente Duterte iti rurodna iti agtultuloy a kurapsion iti gobierno, ket kiniddawna pay kadagiti adda ammona a mapaspasamak a kurapsion nga ipulongda kenkuana, ken mangted pay ti gunggona. Ngem sino koma ti addaan-tured a pribado nga umili ti mangkalaban kadagiti opisial ti gobierno a mainanaig iti kurapsion?

Impalgak ni Presidential Anti-Corruption Commission Chairman Grego Belgica nga adda insubmitarda a listaan dagiti opisial ti gobierno a maatap nga adda pakainaiganna iti kurapsion nangruna iti DPWH.

Adu dagiti mangkarkarit ken ni Presidente Duterte nga ibutaktakna ti kinasiasino dagiti kongresista a naipalaon iti listaan ti PACC, kas kadagiti inaramidna a panangibulgar kadagiti inakusaranna a “narco politicians” wenno dagiti politiko nga adda pakainaiganna iti illegal a droga. Ngem pagkedkedan dayta ti Presidente ta dagiti kongresista ket addada iti Legislative Branch ti gobierno a kapada ti Executive Branch a direkta nga idauluanna.

Adu dagiti mamati a kas Presidente no napudno isuna iti kampania kontra kurapsion ket saan koma a bumdeng a mangibutaktak iti kinasiasino dagitoy nga opisial ti gobierno nga adda pakainaiganna iti nakaro a kurapsion.

No nabaelan ni Presidente Duterte nga imbulgar ti publiko ti nagan dagiti politiko ken dadduma pay nga opisial ti gobierno nga adda pannakainaigna iti illegal a droga, apay a dina maaramid nga inaganan dagiti kongresista a naipalaon iti listaan ti PACC.

Nasayaat koma nga inagananen ni Presidente Duterte dagitoy mapapati a kurap a kongresista tapno saan met a mairaman dagiti inosente.

Nagkas-ang ti pannakairaman dagiti kongresista kadagiti nakaro a kurapsion ta isuda ti mangisagsagana iti tinawen a National Budget ti Pilipinas ket ipaneknek dayta dagiti alegasion nga agtultuloy dagiti budget insertions ken kayariganna ti pork barrel fund nga indeklaran ti Supreme Court idi 2013 nga illegal kabayatan ti kabara idi ti kontrobersia a pork barrel scam a nakainaigan dagiti dadduma a kameng ti Kongreso.    

Ti agtultuloy a kurapsion iti gobierno ti ad-adda a mangirarem iti biag dagiti napanglaw. Inkari idi panawen ti kampania ni Presidente Duterte a gibusanna ti kurapsion kalaksidan ti illegal a droga, ngem dandanin aggibus ti terminona ket nakaro latta ti kunniber iti administrasionna. No adda man kapatgan nga ipaay ti gobierno nga aginaldo wenno sagut kadagiti Pilipino ket ti pannakapasardengen ti kurapsion tapno iti masakbayan ket gumin-awa ti biag.