Pannakaideklarar a National Cultural Treasure dagiti daan a balay iti Vigan City, iyusuat ti SP 

PHOTO: One of the Spanish colonial houses damaged by Typhoon Ompong. (photo by Jasper Allibang Espejo)

VIGAN CITY – Kiddawen ti Sangguniang Panlalawigan ti Ilocos Sur iti National Commission on Culture and Arts ken kadagiti maseknan nga ahensia ti Nasional a Gobierno ti pannakaideklarar a National Cultural Treasure dagiti amin a kadaanan a balay iti daytoy a siudad a nabangon pay idi panawen dagiti Kastila tapno makaipaay ti gobierno iti pondo para ti pannakamantiner ken pannakatarimaanda ket agtultuloy ti kinatibker ken kinangayedda a kangrunaan nga atraksion kadagiti turista a pumaspasiar iti Ilocos Sur.

Dayta ti inrakurak ni Vice Governor Jeremias “Jerry” Singson kadagiti kameng ti Ilocos Sur Integrated Press kabayatan ti pannakiumanda kenkuana iti naangay a Kapihan iti Amianan Media Forum.

Impasingked ni Vice Gov. Singson nga ikagumaan ti Sanguniang Panlalawigan nga idauluanna ti panangipasada iti resolusion a maiturong iti NCAA ken dagiti dadduma a maseknan a gobierno a panangkiddawda ti pannakabigbig ken pannakaideklarar dagiti amin a kadaanan a balay iti sentro ti Vigan City kas National Cultural Treasure tapno mabalinton a punduan ti gobierno ti pannakatarimaan ken pannakamantinerda ket agtalinaedda a natibker iti panawen dagiti didigra.

Inrakurakna nga ikagumaan ti Sangguniang Panlalawigan nga aramiden ti inyusuat ni SP Member Gina Cordero Pe Benito a nangesponsor iti resolusion para ti pannakabigbig ken panangideklarar ti National Archives of the Philippines kas National Cultural Treasure kadagiti kadaanan a rekord iti Archives iti Arkidiosesis ti Nueva Segovia idi Disiembre 6, 2018. Impaganetgetna a gapu ti panagbalinen a National Cultural Treasure dagiti record a nakadulin iti Nueva Segovia Archives ket mabalinen a tumulong ti gobierno iti pannakamantiner ti pasdek nga ayanda.

Impaganetget ti Vice Governor ti kinapateg dagiti kadaanan a balay ken pasdek iti siudad a kangrunaan nga atraksion kadagiti turista ken namagbalin ti Vigan City kas World Heritage Site ken maysa kadagiti New Seven Wonder Cities of the World. Inaklonna nga adda dagiti sumagmamano a kadaanan a balay a nadadael kabayatan ti naglabas a bagyo, ken addan dagiti mangrugin nga agrupok gapu iti kinadaanda, ngem saan a mapatarimaan dagiti nagtawid gapu ti kaaduda ken awan pay ti masinunuo nga agtagikua.

 Pinatalgedanna ti agtultuloy a suportana iti pannakasaluad dagiti kadaanan a kultura, ugali ken tradision dagiti Ilokano tapno mayallawatda iti sumaruno a henerasion. Impasingkedna met ti pannakapareorganisarto kalpasan ti eleksion ti Ilocos Sur Historical Committee nga agsukisok kadagiti nakalemmeng a napnuan-kaipapanan a pakasaritaan, pasamak ken disso iti Ilocos Sur tapno madokumentuanda. Inaklonna ti panagkamtud ti pangulo ti ISHC gapu ti panagkandidato ken pannakaabakna a chairman iti napalabas a Barangay Election idi Mayo 2018. Impatalgedna ti naan-anay a suportana ken ti Provincial Government iti mareorganisarton nga ISHC tapno agballigi kadagiti panggepna mangidokumento kadagiti napateg a pasamak ken lugar iti Ilocos Sur nga agbalinto a paset ti nabaknang a pakasaritaan ti probinsia.

Mainaig iti politika, inaklonna ti kaadda ti epekto iti pamilia ken partidoda a Bileg ti panagsango iti kina-kongresista iti Umuna a Distrito da Incumbent Rep. Deogracias Victor Savellano ken Ex Rep. Ronald Singson. Mangnamnama met nga uray no saanen a nagtuloy nga agpailayon ni Rep. Eric Singson a kongresista ti Maikadua Distrito ta ti anakna a ni Kristine Grace Singson Meehan ti agkandidato, ken kaanakanna da Mayor Zuriel Zaragoza, kandidato a para gobernador, ken sigud nga SPM Anicka Zaragoza ket agtultuloy ti panangsuportana iti Bileg Party a pagpailayonanda ken ni Gov. Ryan Singson, ken isuna kas bise gobernador.

Impalgak ni Vice Gov. Singson ti nainget a salisal iti politika dagiti pamilia Singson ken Zaragoza nga agpada nga agtarigagay nga agserbi kadagiti umili, ken uray nabara ti sinnukat ti sarita dagiti dadduma a kandidato iti Ilocos Sur kas idiay Narvacan a pagbalubalan iti kina-mayor da sigud a Mayor Edgardo Zaragoza ken sigud a Gobernador Luis “Chavit” Singson a manongna, mangnamnama iti nakappia nga eleksion iti probinsia. (Eden Alviar)