Pannakaidispley produkto iti igid ti kalsada, naisingasin

CABUGAO, Ilocos Sur – Kinuna ni Vice Gov. Deogracias Victor Savellano a maysa a proposal ti gobierno probinsial ti pannakaipasdek kada ili dagiti pagidispleyan kadagiti produktoda a mailako iti igid ti dalan.

Kinuna ni Savellano a pagdur-asan ti maysa nga ili no adda pagidispleyanda kadagiti produktoda iti igid ti kalsada tapno adda paggatangan dagiti turista ken sangsangaili.

Dinakamat ti bise gobernador dagiti paglakuan kadagiti dried fish iti Damortis, La Union nga idi damo ket bassit laeng dagiti puesto ngem nataratarda itan iti igid ti kalsada.

Ditoy Ilocos Sur, addan sumagmamano nga ili nga adda pagidispleyanda iti produktoda a basi, suka ken dadduma pay a tagilako manipud iti unas iti igid ti kalsada a kas iti San Ildefonso ken Sta. Maria a mangipapaay iti pamastrekan kadagiti lumugar.#