Pannakaimbestiga pannakapapatay ti rebel-returnee, naidagadag

CANDON CITY – Indagadag ni Sgt. Marcelo Garcia, civil military affairs officer ti 50th Infantry Battalion bayat ti programa nga “Oras ti Soldado” a naipatangatang iti DZTP Radio Tirad Pass a mangisayangkat koma dagiti militante a grupo a kas iti Karapatan-Ilocos iti inbestigasion tapno maammuan no asino dagiti pimmatay ken ni Johnny Habon, 34, maysa a rebel-returnee.

Segun iti report, adda ni Habon iti uneg ti pagtaenganda iti sardam ti Hulio 1 idi adda nangawag kenkuana iti paraanganda.

Idi luktan ti biktima ti ridaw, pinaltogan dagiti suspetsa a dua a lalaki ken maysa a babai.

Kimmappon ni Habon iti NPA idi 2003 ngem nagsubli met laeng iti sidong ti gobierno idi 2004.

Kinuna ni Garcia a rumbeng laeng nga agimbestiga dagiti militante a grupo ta masuspetsa a kameng ti NPA dagiti nangpapatay ken ni Habon.#