Footer

Pannakaingato ti bayadan a premium ti PhilHealth naitantan

CANDON CITY – Naitantan ti pannakaingato ti bayadan iti premium dagiti kameng ti Philippine Health Inssurance Corporation (PhilHealth), daytoy ti impakaammo ni Francis Canosa, OIC-Provincial Manager ti PhilHealth-Ilocos Sur itay nabiit.

Segun ken ni Canosa, idi koma Oktubre 1 a mangrugi a maipangato ti bayadan dagiti kameng ti PhilHealth iti premiumda ngem naisanud agingga iti Enero inton umay a tawen.

Sakbay daytoy, impakaammon ti PhilHealth ti ingangato ti premium a bayadan dagiti PhilHealth members iti P200 iti binulan wenno P600 iti tunggal quarter.

Kinuna ni Canosa nga iti isasagpat ti Enero 2013, aggigiddanton ti pannakaingato ti bayadan a premium dagiti kamkameng ti PhilHealth a pakairamanan dagiti boluntario, OFWs, pribado a sektor ken dagiti empleado iti gobierno. (Danny Antalan)