Pannakaipuslit illegal logs, nalapdan

SUYO, Ilocos Sur – Maysa a van a nagkarga iti illegal a napukan a troso ti pinasardeng dagiti barangay officials idi bigat ti Agosto 6.

Intawag dagiti barangay officials ti impormasion iti kapolisan ket dagus met a nagresponde dagitoy tapno beripikarenda ti kinaagpayso daytoy.

Sakbayna, nakikoordinar dagiti personnel ti DENR kadagiti barangay officials mainaig iti maysa a Hyundai Grace van a naireport a lumabas iti Baringcucurong a nagkarga kadagiti troso.

Kiniddaw dagiti polis ken ni Edgar Gagtan y Tejada, 41, drayber iti van, no adda permitna a mangibiahe iti napukan a troso ket idi awan ti maipakitana, naipan iti police station agraman ti kaduana a ni Erwin German y Siraga, 20, baro, ken residente iti Barangay Villa Garcia, Sta. Cruz, Ilocos Sur.

Naipaima met ti van ken ti kargana a troso iti DENR office iti Barangay Bitalag, Tagudin, Ilocos Sur.

Saan a nadakamat iti report no sadino ti pakaidissaagan ti karga a troso ti van.#