Pannakairakurak iti publiko ti listaan dagiti narco politicians sakbay ti eleksion

NAGUDUA ti kapanunotan dagiti Pilipino iti plano ni Secretary Eduardo Año ti Department of Interior and Local Government a pannakairakurak iti publiko sakbay ti eleksion inton Mayo 13, 2019 ti listaan dagiti politiko nga adda pakainaiganna iti illegal a droga.

Umad-adun dagiti kumanunong kadagiti senador a da Panfilo Lacson, Richard Gordon ken Franklin Drilon a mangkonkontra iti singasing a pannakaipablaak ti narcolist sakbay ti eleksion ta saan a pasingkedan dayta a gannuat ti pannakaabak wenno pannaka-disqualify dagiti kandidato nga adda pannakainaigna iti illegal a droga, ken saan a patas ken nainkalintegan para kadagiti inosente a kandidato.

Supiaten met ti Commission on Human Rights ti plano a pannakairakurak iti publiko ti listaan dagiti narco politicians ta dayta ket mailabsing ti karbengan ti suspek a maibilang nga inosente agingga a mapaneknekan a nagbasol nga awan-duduana iti korte.

Impalgak met ti Comission on Elections a ti panagirakurak iti nagan dagiti narco politicians ket saanna a sigud nga i-disqualify dagiti kandidato iti eleksion, ngem kasapulan ti final conviction manipud iti Korte Suprema sakbay a maideklarar ti narco politician a saan a kualipikado nga agkandidato.

Ti pannakairakurak ti listaan dagiti narco politicians ket maibilang a wagas ti saan a patas a pangkampania a dakes ti epektona kadagiti inosente a mairaman iti listaan. Naipakadawyanen kadagiti agbabalubal a kandidato ken dagiti pasurotda ti panagiparuar kadagiti black propaganda kontra kadagiti kasalisalda babaen ti panangakusarda kadakuada kadagiti dakes nga aramid. No sakbay ti eleksion, agraira dagiti isyu ti pamarpardaya a pannakaakusar kadagiti kandidato kadagiti illegal nga aramid.

No mairakurak ti listaan dagiti narco politicians, ibilang ken pagrason la ketdi dagiti mainaganan a kandidato a pamarpardaya laeng wenno black propaganda dayta a listaan a naigagara a mangdadael iti dayaw ken reputasionda tapno saan ida nga ibotos dagiti botante.

Imbes a ti panangipablaak iti publiko ti listaan dagiti narco politicians ti mapasamak, saan ngata a nasaysayaat a ti DILG ket agbirok ken agurnong kadagiti natibker nga ebidensia ket idarumda dagiti suspek tapno mapaneknekan iti korte a nagbasolda ket no masentensiaanda a mabalud ket ma-disqualified-danton nga agkandidato iti uray ania a posision. Sakupen ti DILG ti Philippine National Police a natudingan a maysa kadagiti kangrunaan nga ahensia ti gobierno a mangiyim-implementar ti nainget a kampania ni Presidente Rodrigo Duterte kontra illegal a droga.

No matuloy ti plano a pannakairakurak iti publiko ti listaan dagiti narco politicians, masinunuo nga adunto la ketdi dagiti opisial ti gobierno a maidarum iti kaso a kriminal ken administratibo babaen kadagiti inakusaranda, inosente man wenno adda illegal nga aramidna. Dagiti inosente irupirda la ketdi ti kinaawan ti basolda. Dagiti adda dakes nga aramidna, agdarumda latta tapno mapagparang nga inosenteda.

Agamak dagiti dadduma a kandidato nangruna dagiti saan a kadua ti administrasion iti pannakairakurak ti listaan dagiti narco politicians ta amangan no mausar laeng ti narcolist a mangpardaya ken mangpadakes kadagiti saan a kaaliado ti agdama a turay a mangdadael ti reputasionda ken ti pamiliada tapno maabakda iti eleksion. Mabalin pay a mausar ti narcolist a pang-pressure kadagiti lokal a kandidato a saanda a suportaran dagiti oposision a para senador no saanda a kayat ti mairaman iti listaan dagiti narco politicians.

Madanagan met dagiti politiko a ti pannakairamanda iti listaan ket agbalinda a target dagiti grupo ti vigilante wenno death squad. Addan dagiti a politiko a napapatay a nairaman kadagiti nagkauna a narcolist nga inrakurak ni Presidente Duterte iti naglabas a tawen pakairamanan dagiti sumagmamano a mayor.

Napaneknekanen kadagiti naglabas nga eleksion a saan nga umanay a pakaabakan dagiti narco politicians a kandidato ti pannakaammo ti publiko nga adda pannakainaigda iti illegal a droga. Addan dagiti agdadata a narco politicians a nakapagtalinaedda latta iti turay gapu ti kaadu ti kuarta a gastosenda iti eleksion, ken kaadda dagiti koneksionda iti gobierno.

Idi sakbay ti Barangay Election idi 2018 ket adda nairakurak iti publiko a listaan dagiti opisial ti barangay nga adda pannakainaigda iti illegal a droga, ngem adu kadagiti nagkandidato manen ti nangabak latta iti eleksion.

Inrakurak ni Philippine Drug Enforcement Agency Director General Aaron Aquino nga adda 82 a politiko iti narcolist ket 64 dagiti agkandidato, ken 51 kadakuada dagiti na-validate iti napagtitipon nga impormasion dagiti nagduduma nga intelligence units ti PDEA, PNP, Armed Forces of the Philippines ken National Intelligence Coordinating Agency. Segun ken ni Aquino, kaykayatna a maidarum nga umuna dagiti narco politicians sakbay ti pannakairakurakda iti publiko ta natibker met dagiti ebidensiada, ngem agtungpal no ibilin ni Presidente Duterte

Saan maikkat ti panagdudua dagiti adda iti oposision iti kinapudno ti listaan ta uray no paspasingkedan ti DILG ken PDEA a nagdalan iti nainget a pannakaamiris ti narco list nga adda iti ima ni Presidente Duterte, ket naminsanen nga imbabawina ti nagan ti opisial iti Pangasinan nga inakusaranna nga adda pannakainaigna iti illegal a droga. Dimmawat pay ti dispensar gapu ti panagbiddut dagiti nangisagana iti listaan.

Nagkas-ang ti kasta a panagbiddut a pannakairaman ti nagan dagiti inosente a tattao iti narcolist ta uray no agpadispensarton ti Presidente ket napiltakanen ti dayaw ken reputasion ti napabasol ken naparpardaya a tao, ket saan laeng a ti naakusaran ti agsagaba ngem uray pay ti pamiliana ken dagiti ipatpategna iti biag.

No agpayso a nainget ti pannakaamiris ti listaan dagiti narco politicians, rebbengna nga adda kasinginna a natibker nga ebidensia ti pananangakusar iti maysa a tao nga adda pannakainaigna iti illegal a droga. No adda natibker nga ebidensia, rumbeng a maidarum dagiti narco politicians ta husgadonton ti mangikeddeng no inosente wenno nagbasolda. (Eden Alviar)