Footer

Pannakairaman ti agricultural sector iti PSA 2018 Business and Industry Survey, nakiddaw

VIGAN CITY – Pannakairaman ti Agricultural Industry iti Annual and Business and Industry Survey ti Philippine Statistics Authority iti Region I tapno maamuan dagiti policy makers ti nasional a gobierno ti kasasaad ti agrikultura iti Ilocos Region tapno makaiwayatda kadagiti gannuat ken programa a mangpadur-as iti daytoy a sektor a kadakkelan nga industria iti Pilipinas.

Dayta ti kiniddaw ti pannakabagi ti media iti naangay a taripnong dagiti pannakabagi ti nagduduma a negosio ken industria kadagiti opisial ti PSA Ilocos Sur iti maysa a hotel iti daytoy a siudad.

Nakiddaw ti pannakairaman ti Agricultural industry iti sumaruno nga annual survey ti PSA ta napaliiw a nakabasbassit a porsiento dagiti nagsungbat ken input mainaig iti daytoy a sektor uray no isu ti kadakkelan nga industria iti intero a pagilian pakairamanan ti Ilocos Sur. Naidatag nga iti nagsasaruno a tallo a tawen a panagatender ti media iti taripnong ket awan-pulos ti pannakabagi dagiti agpapaay iti industria ti agrikultura uray no nagadu dagiti mangnamnama iti daytoy a sektor. Impaganetget ti kameng ti media a no mapadur-as ti Agricultural industry ket agprogreso met ti biag dagiti adu a Pilipino nga agdepdepender iti agrikultura.

Inlawlawag ni PSA Provincial Director Reynor Fernandez nga awan ti naawis a pannakabagi ti Agricultural industry wenno farming industry ta awan ti maipatpatulod kadakuada a survey questionaires. Impakaammona nga addan dagiti sumagmamano a nakarehistro wenno formal agricultural industry iti Ilocos Sur a mabalinda nga awisen iti sumarsaruno a taripnong tapno agsungbat kadagiti survey ti PSA. Inlawlawagna a ti survey nga agdama nga isaysayangkat ti ahensiada ken saan amin nga industria ti sakupenna, ngem ti census ket mairaman dagiti amin a sektor ken industria.

Kabayatan ti taripnong, impresentar dagiti agserserbi iti PSA Provincial Office ti resulta dagiti annual survey iti business and industry, ken information and communication technology a ti umun-una a ket iti benneg iti komersio, iti marketing, ken dadduma pay a mainaig iti negosio, ken adda iti baba ti Agricultural industry iti amin a rehion ti Pilipinas.

Impanakkel met ti Provincial Director a mabigbig ti PSA Ilocos Sur iti 100% a resulta dagiti sumungsungbat kadagiti survey questionaires a maiwarwaras kadagiti nagduduma a sektor ken indusria iti Ilocos Sur. Kiniddawna ti agtultuloy a suporta dagiti naawis nga industria, ken napudno a panangsungbatda kadagiti survey questionnaires tapno adda pagbasaran dagiti government policy makers iti panagaramidda kadagiti programa a mangpadur-as dagiti nagduduma nga industria iti pagilian. (Eden Alviar)