Latest News: Pannakairamut iti Dios dagiti amin a kultura, naipalagip iti rugi ti Ylocos Kannawidan Festival | Tawid News Magazine - Weekly Ilocos News 📰

Pannakairamut iti Dios dagiti amin a kultura, naipalagip iti rugi ti Ylocos Kannawidan Festival

Nasantuan a Misa kas panangirugi ti Ilocos Kannawidan Festival a panangrambak ti maika-201 nga anibersario ti probinsia nga Ilocos Sur. (photo by Eden A. Alviar)

VIGAN CITY – Pannakairamut iti Dios dagiti amin nga aramid iti kultura ken kannawidan dagiti Ilokano tapno agbalinda a pakaigloriaan ken a nakaay-ayo iti Apo.

Dayta ti kangrunaan nga impalagip ni Msgr. Cosmenio Rosimo Jr. Vicar General ti Arkidiosesis ti Nueva Segovia, iti panangidaulona iti Nasantuan a Misa kas panangirugi ti Ilocos Kannawidan Festival a panangrambak ti maika-201 nga anibersario ti probinsia nga Ilocos Sur. Naangay ti Misa sadiay St. Paul Cathedral idi malem ti Enero 28, 2019.

Nakikaysa iti Misa da Msgr. Gary Noel Formoso, Kura Paroko iti Vigan, ken dadduma pay a papadi iti Nueva Segovia. Indauluan met da Gov. Ryan Singson ken Vice Gov. Jeremias Singson dagiti opisial ken agserserbi iti probinsial a gobierno ken dadduma pay nga ahensia ti nasional a gobierno kabayatan ti Misa. Nagkaykaysada a nagyaman iti Dios kadagiti adu a bendision ken paraburna iti probinsia ken kadagiti umili iti Ilocos Sur.

Iti homilia ni Msgr. Rosimo, impalgakna nga iti dayta nga aldaw ket rambakan met ti Iglesia Katolika ti Piesta ni Santo Tomas de Aquino a mamati a “ti kultura ken kannawidan ket nangatngato latta ni Apo Jesus.” Inlawlawagna a dayta a Misa ken ti maisaruno a prusision ket nasayaat unay a panangirugi iti Kannawidan Festival a mayusuat babaen kadagiti narelihiosuan a gannuat.

Impalagipna ti kinarelihioso dagiti Ilokano manipud pay idi nagkauna a panawen, ngem adun dagiti namalbaliwan dagiti galad ken ugali dagiti umili iti panaglabas ti tiempo. Inlawlawagna a ti kultura ken kannawidan ket adda latta nauneg a pakainaiganna iti pammati.

Inlawlawagna nga adu dagiti baro a kannawidan dagiti Ilokano a maikontra iti pagayatan ti Dios ken pagimbagan dagiti tattao. Impalgakna ti panagbalinen ti panagsusugal a kaugalian dagiti agminatay a mangimameg ti panagbiag dagiti tattao. Impalagipna nga idi un-unana a panawen ket saan pay met a nauso ti sugal kadagiti agminatay ket umanayen dagiti kadawyan nga ay-ayam dagiti makiminatay.

“Kaano pay a nagbalin a kannawidan dagiti Ilokano nga agminatay ti panagpasugal iti dado?” kinuna ni Msgr. Rosimo a nangipalagip iti maysa a klase ti sugal a napigsa iti pustana.

Impakaammona pay ti maysa a klase ti sugal a pagaayat dagiti Ilokano ket ti pallot iti manok sadiay galiera a kanayon a pagaaduan dagiti lallaki. Inlawlawagna a ti pallot ket “past time” laeng koma dagiti tattao, ngem nagbalin metten a “full time.” Impalagipna pay ti saan a maiparbeng a pannakaaramat iti galiera ti “kristo,” ti para awag iti pusta dagiti agsusugal iti pallot.

“Adu dagiti nakairuamantayo nga ar-aramiden a nasken a panunotentayo a nasayaat no makadakes kadatayo; saantayo koma nga ipalubos a ti kultura wenno kannawidan ti mangimpluensia ken mangiturong kadatayo; amin nga aramidtayo ket nairamut koma iti Dios ken para iti pakaigloriaan ni Apo Jesus,” kinuna ni Msgr. Rosimo iti paggibusan ti homiliana.

Naisaruno iti Misa ti prusision a nakailibutan dagiti imahe dagiti santo ken santa a patron dagiti nagduduma a parokia iti Nueva Segovia. Nakipagpaset iti prusision dagiti opisial ken agserserbi iti probinsial a gobierno ken dagiti attached agencies. Nakiprusision pay dagiti kandidata iti Saniata Beauty Pageant a nangirepresentar kadagiti nagduduma nga ili ken siudad iti Ilocos Sur.

Maitampok iti tallo a lawas nga Ylocos Kannawidan Festival 2019 dagiti nagduduma a programa ken gannuat para iti pannakaitandudo dagiti nagkauna a kaugalian ken tradision a paset ti kultura dagiti Ilokano, ken kabaruanan a pagaayat dagiti agkabannuag ken agtutubo iti Ilocos Sur.

Nairugi ti Ylocos Kannawidan Festival idi 2008 kabayatan ti panagtakem ni Gov. Deogracias Victor Savellano kas piesta a panangilagip ti panagsina ti sigud a maymaysa a probinsia nga Ylocos idi Pebrero 2, 1818 babaen ti dekreto ti Ari ti España a nakabukelan dagiti dua a probinsia nga Ilocos Sur ken Ilocos Norte.