Footer

Pannakaitandudo ti organiko a panagtalon, natratar iti Region I Agricultural Congress

VIGAN CITY – PANNAKAITANDUDO ti organiko a panagtalon iti Ilocos Region tapno mapasubli ti sigud a kinabaknang dagiti kataltalonan ken mapataud dagiti natalged a produkto a taraon nga ipauneg dagiti tattao.

Dayta ti panggep ti naangay nga Organic Farming Congress ti Department of Agriculture Region I Field Office. Naangay ti pasken sadiay Hotel Linda Suites, Vigan City idi Hunio 21, 2018.

Nayadal kadagiti delegado dagiti kaudian a panagdur-as ti organiko a panagtalon. Nailako dagiti nagduduma a produkto ti organic farming. Naipaay pay ti pammadayaw ken gunggona kadagiti mabigbig nga organic farmers iti Region I.

Iti press conference nga inwayat dagiti opisial ti DA ken ni Ilocos Sur First District Representative Deogracias Victor “DV” Savellano, nasungbatan dagiti nagduduma a saludsod ken pakaseknan dagiti kameng ti media.

Indatag ti pannakabagi ti media ti padas ken paliiwna a maysa kadagiti advocacy ti Iglesia Katolika babaen ti Social Action Commission ket ti pannakaitandudo ti organiko a panagtalon kas pannakitimpuyog ti Simbaan iti panangsaluad ti nakaparsuaan ken panangpataud iti natalged a taraon. Naidatag nga iti laksid ti gannuat ti gobierno ken pribado a sektor a mangitandudo ti organiko a panagtalon ket agtultuloy met latta ti gannuat dagiti lokal a gobierno a mangidurduron ti nakainsigudan a panagtalon wenno conventional farming a pakausaran dagiti kemikal nga abono ken pestisidio, ken agtultuloy pay ti panagiwaras dagiti local government units kadagiti komersial nga abono ken pestisidio.

Inlawlawag dagiti opisial ti DA a da Dir. Jeffrey Laruan iti National Organic Agriculture Board ken Dir. Orlando Lorenzana iti Research and Regulation ti kaaddan ti National Organic Farming Act wenno Republic Act 10068 a mangsakup iti promosion ti organiko a panagtalon. Nailawlawag a babaen iti dayta a linteg, mapalubosan ti Good Agricultural Practice a pakausaran ti conventional farming a pakaaramatan dagiti kemikal nga abono ken pestisidio tapno mapagtalinaed ti kaadu ti apit a kasapulan a pagbiag dagiti tattao. Idurduron pay ti linteg ti pannakaadaptar ti organiko a panagtalon.

Naipaganetget a napalubosan ti conventional farming gapu ta no organic farming laeng ti maadaptar ket agkurang dagiti maapit gapu ta nabaybayag ti proseso daytoy ken basbassit pay dagiti maapit kadagiti umun-una a tawen, ken santo laeng umadu ti maapit inton mapasublin ti naan-anay a kinabaknang ti daga.

Impakaammo pay dagiti DA officials a nakurangan iti P400 Million iti sigud a P1 Billion nga annual budget ti Organic Farming ket napagbalinen a P600 Million.  Kiniddawda ken ni Cong. Savellano ti suportana tapno manayonan ti annual budget para iti Organic Farming.

Nasdaaw ni Cong. Savellano iti atras-abante ken nabuntog a panagdur-as ti programa ti gobierno iti pannakaitandudo ti organiko a panagtalon, kas maysa kadagiti mangidurduron ti organic farming iti Ilocos Sur idi isuna pay laeng ti gobernador ti probinsia ken pinadur-asna ti Barangay Demo Farm sadiay Labnig, San Juan para ti organiko a panagtalon. Kiniddawna kadagiti opisial ti DA ti panagbalin ti Umuna a Distrito iti Ilocos Sur kas pilot project iti pannakaitandudo ti organic farming, ken impasingkedna ti suportana iti programa.

Impakaammo pay ni Cong. Savellano ti pannakaruk-at ti P20 Million a pondo a naggapu iti DA ken naipaima iti Nueva Segovia Consortium of Cooperatives a maipautang iti 6% interest kadagiti mannalon nga agmula iti bawang iti probinsia a mabayadan kalpasan ti pannakaapit ken pannakalakoda kadagiti produktoda.

Naipakaammo pay iti press conference dagiti nagduduma a talon ken pagsanayan iti organiko a panagtalon iti Ilocos Sur pakairamanan ti Provincial Jail Farm ken ti Anawim Institute of Mission sadiay Tapao, Sinait, nga baybayabayen ni Rev. Fr. Albert Rabe ken imanmanehar ti grupo dagiti mannalon a laygo a kameng ti Basic Ecclessial Community.  (Eden Alviar)