Pannakanayon subsidy, soft loan, nakiddaw

CABUGAO, Ilocos Sur – Kiniddaw manen dagiti grupo dagiti mannalon iti mayor ditoy nga ili ti pannakanayon ti subsidy ken soft loans nga impaay kadakuada ti gobierno munisipal idi napan a tawen.

Kinuna ni Elmer Borromeo, presidente ti Federated Farmers Organization ditoy nga ili a nabayadandan ti soft loan nga impaay ti gobierno munisipal nga idadauluan ni Mayor Edgar S. Cobangbang, Jr. ket kiniddawda iti mayor a maituloy a maited kadakuada ti nasao a pondo.

Segun ken ni Borromeo, naikkan dagiti farmers organization iti sag-P23,000.00 a a soft loan ket dagitoy a gunglo ti nagpautang met kadagiti miembro ti organisasion a binayadanda iti innem a bulan.

Impanamnama ni Cobangbang a maikkan iti kanayonan a benepisio amin dagiti grupo dagiti mannalon ditoy nga ili  apaman a maawat ti munisipio ti bingayna iti R.A. 7171.#