Pannakapagawid dagiti OFW sadiay Middle East

MAPAGAWID ngata ti gobierno ti Pilipinas dagiti nagadu nga Overseas Filipino Workers sadiay Iran, Iraq ken kabangibangda pagilian iti sango ti pangta ti gerra iti Middle East? Ania ti aramiden ti gobierno kadagiti saanda a kayat a panawan dagiti pagtrabahuanda ta awan met ti namnamaenda a pagsapulanda iti Pilipinas no agawidda iti pagilian?

Nasurok a 2.1 Million nga OFW dagiti lehitimo a mangmangged sadiay Middle East dagiti mabalin a maapektaran iti agdama a mapaspasamak a riribuk iti daytoy a rehion a mabalin nga agtinnag iti ranget iti nagbaetan dagiti puersa ti United States of America ken dagiti Iranian Forces ken kaaliadona nga armado a puersa.  Naseggadan ti riribuk kalpasan a napapatay kabayatan ti US drone bombing sadiay Baghdad airport, Iraq a nakapapatayan ni Major General Qassem Soleimani, Commander ti Quds Force ti Islamic Revolutionary Guard Corps ti Iran babaen ti mandar ni US President Donald Trump.

Para ken ni Trump ken dagiti dadduma nga Amerikano, ibilangda ni Soleimani a lider dagiti terorista kas kadagiti immuna a napapatayen kabayatan kadagiti US military operations a da Osama Bin Laden ti Al Qaed, ken ni Abu Bakr Al-Baghdadi ti Islamic State of Iraq and Syria, gapu kadagiti adu a terorismo nga indauluan ti napapatay nga Iranian general.

Para kadagiti Iranian ken dadduma pay nga Arabo, bigbigenda ni Soleimani kas bannuar a napapatay gapu ti panangirupirda ti interesda kontra kadagiti US Forces. Nagprotesta dagiti adu nga Iranian, ken pinuntiriadan iti missiles dagiti US military bases iti Iraq. Ngem awan pay ti nalawag a report iti epekto dagiti missile attacks. Impalgaken dagiti US officials nga isardengdan ti panagatake kadagiti Iranian forces, ngem ketdi paingetanda ti economic and political sanctions kontra Iran. No man pay ibagbagan dagiti Iranian officials a naibalesdan ti pannakapapatay ni Soleimani, ngem saanda a matengngel dagiti kadaraanda no mangiwayat latta ti dakes a tignay kontra US a mabalin a mangsilmut iti gerra iti Middle East. 

Saan a kayat ni Presidente Rodrigo Duterta a maipit iti gerra dagiti OFW kadagiti maapektaran a pagilian no agtinnag iti gubat ti riribuk iti Iraq ken Iran. Minandarnan dagiti maseknan a kameng ti gabinetena tapno mangisayangkatda iti nasapsapa a repatriation dagiti OFW iti Middle East sakbay a tumpuar ti nakaro a riribuk.

Dinutokan ni Presidente Duterte ti Environment and Natural Resources Secretary Roy Cimatu kas Special Presidential Envoy iti Middle East para ti repatriation dagiti OFW. Ni Cimatu ket retirado nga Army General ken Chief of Staff ti Armed Forces of the Philippines, ken sigud nga Special Envoy ni Presidente Gloria Macapagal Arroyo ken Presidente Benigno Aquino III sadiay Middle East kabayatan ti riribuk.  

Napan metten sadiay Middle East da Foreign Affairs Secretary da Teodoro Locsin Jr., Labor Secretary Silvestre Bello III ken Defense Secretary Delfin Lorenzana para iti natalged a pannakaisayangkat ti repatriation dagiti OFW iti Middle East.

Nakasaganan dagiti dua a battalion ti Army ken Marines a maipatulod sadiay Middle East para ti pannakaproseso ken pannakabayabay dagiti OFW nga agawid iti Pilipinas. Nakasaganan dagiti eroplano a C150 ken babbabassit a cargo planes ti Air Force, ken dagiti barko ti Navy ken Coast Guard para iti repatriation dagiti OFW. Np saan nga umanay dagiti eroplano ken barko ti AFP, mabalin nga agarkila ti gobierno kadagiti pribado wenno commercial planes ken barko.

Mangisayangkat metten ti Kongreso ti special session tapno mangiyalokarda iti naan-anay nga stand-by fund para iti repatriation dagiti OFW ta dakkel a pondo ti kasapulan iti pannakapagawidda ken pangtulong kadakuada no makaawiddanton iti Pilipinas.

Iti panagballigi ti plano ti gobierno para ti repatriation dagiti OFW iti Middle East ket agbatay pay iti pangngeddeng dagiti mangmangged iti Middle East no kayatda ti agawid iti Pilipinas. Kadagitoy a panawen a saan pay a nangrugi ti gerra ket adun dagiti OFW ti nangipeksa ti kaririknada a saanda a kayat a panawan dagiti trabahoda ken agawid iti Pilipinas ta awan met ti namnamaenda a pagtrabahuanda.

Napasamak dayta ti kasta a situasion sadiay Iraq ken Libya a saan a kayat dagiti OFW ti mangpanaw kadagiti trabahoda ken agawid iti Pilipinas aginggana a kimmaro ti riribuk, ket narigatan ti gobierno a nangiyawid kadagiti kadagiti napupok kadagiti nariribuk a lugar.  

Saan a mapuersa ti gobierno dagiti OFW kadagiti nariribuk a pagilian a pagawiden iti Pilipinas no saanda a kayat. Kasapulan nga agdisnudo dagiti OFW nga agawid iti pagilian sakbay a tumpuar ti gubat ta amangan no awanton ti gundawayda ket iti ganggannaet a pagilian a pagtratrabahuanda iti pakapugsatan ti angesda ket ad-adda nga agladingit ken agrigat dagiti pamilia a pinanawanda. Namin-adun a daras a napasamak dagiti umasping a situasion dagiti OFW iti Middle East, ket ita, naulit manen. Rebbengna nga ikagumaanen ti gobierno a solbaren ti ramut dagiti problema babaen ti panangpadur-as ti ekonomia ken mapaadda dagiti adu ken nasayaat a pagsapulan tapno awanton ti Pilipino a mapan mangged sadiay ballasiw-taaw gapu ta awan ti nasayaat a pagtrabahuanda iti bukodda a pagilian.