Footer

Pannakapalawa ti PhilHealth program, puntiria ti gobernador

VIGAN CITY – Tapno ad-adda pay a mapabileg ti implementasion ti R.A 9241 wenno National Health Insurance Program ditoy probinsia, kiniddaw ni Gov. Deogracias Victor “DV” Savellano iti Sangguniang Panlalawigan a maikkan iti autoridad a sumrek iti katulagan kadagiti town executives para iti pannakailawlawa ti saklawen daytoy a programa.

Iti idadatag ni Dr. Helen Tobias, pangulo ti PhilHealth Provincial Office iti session ti provincial board idi Agosto 14, kinunana a kasapulan ti pammalubos manipud kadagiti kameng iti SP ken ni Savellano a mangallukoy kadagiti lokal a gobierno a mangkita kadagiti indigent a pamilia iti lugarda a saan a nairaman iti programa tapno agbalinda a miembro  iti Philhealth tapno ad-adda pay a mapalawa ti sakupen daytoy a programa ken ad-adu ti matulongan a marigrigat nangruna iti benneg iti salun-at.

Kinuna ni Tobias nga iti agdama, 23% pay laeng kadagiti umili iti probinsia ti nakamiembro iti PhilHealth idinto a puntiria ti gobernador a 30% wenno nasursurok pay ti mabenepisiaran daytoy a programa.

Maibasar iti rekord, agdagup iti 119,212 ti total households ken 11,252 ti inisponsoran ti LGU idinto a 16,977 met iti LGU-PDAF wenno congressional share manipud kadagiti diputado iti umuna ken maikadua a distrito.

Kinuna pay ni Tobias a kasapulan ti nainget a pannakaipatungpal ti resolusion a pinirmaan ni dati a Gov. Luis “Chavit” Singson, ni Savellano ken iti  Philhealth idi bulan iti Hunio daytoy a tawen a pannakaipalawa ti sakupen daytoy a programa tapno magun-odton ti plano ti gobernador a nasurok a 30% kadagiti agindeg iti probinsia ti mabenepisiaran inton umay a tawen. (Nemia Icari)