Pannakapapatay agama iti Laoac, Pangasinan, inbestigaren ti task force

CAMP BGEN OSCAR M FLORENDO — Nangbuangay ni Police Chief Superintendent Franklin Jesus B. Bucayu iti maysa nga espesial a task force a mangisayangkat iti in-depth investigasion iti pannakapapatay ti agama iti Barangay Lebueg, Laoac, Pangasinan idi Hunio 19.

Kinuna ni Bucayu a binuangayna ti Special Investigasion Task Group (SITG) “Eleazar” para iti naun-uneg nga inbestigasion iti pannakapapatay da Rodrigo C. Eleazar, Sr., 62, ken ti anakna a ni Gener, 34, agpada a residente iti Barangay Lebueg ti nadakamat nga ili.

Kanaig daytoy, imbilin ni Police Senior Superintendent Rosueto Ricaforte, provincial director ti Pangasinan ti pannakarelibo nga administratibo ni Police Senior Inspector Lodovico M. Ellazar, Jr. kas hepe ti polis ti Laoac ket dinesignaranna ni Police Inspector Asterio Dismaya kas officer in charge para iti pannakaiwayat ti impartial nga inbestigasion iti pannakapapatay dagiti agama nga Eleazar.

Iti report a dimmanon iti police regional office 1 headquarters, nakipinnaltog dagiti kameng ti Laoac police station nga indauluan ni COP Ellazar, Jr. kadagiti dua nga armado a tattao a nabigbig a da Rodrigo Eleazar ken ti anakna.

Segun iti report,  kinompronta dagiti polis, kaduada dagiti opisial ti Barangay Lebueg dagiti agama nga Eleazar gapu iti  panagpaputokda iti nasao a barangay ngem mapapati a nakirupak dagiti dua kadagiti pannakabagi ti linteg.

Kinuna ni PSI Ellazar a pinaputokan ida ti ub-ubing nga Eleazar a nakapuntaan da Police Officer 3 Erwin Lopez, Barangay Chairman Edgar Mensigos Ellazar ken Barangay Kagawad Rogelio Ellazar Lopez a nakapilitan dagiti polis a nakipinnaltog a nagtungpal iti pannakatay dagiti agama.

Nakarekobre ti Scene of the Crime Operatives (SOCO) iti nakapasamakan ti pammaltog ti maysa a caliber .45 Glock pistol nga addaan iti dua a magasin ken bala, dagiti kapsula manipud iti Glock .45 pistol, ken cartridges para M16 ken M14 rifles.

Naipaima dagitoy iti Regional Crime Laboratory Office 1 para iti ballistics examination.

Naimbestiga met dagiti police officers a nainbolbar iti shootout ken naipaima dagiti armasda iti kustodia ti task force.#