Footer

Pannakapapatay ti inada, di maaklon dagiti annakna

STA. CRUZ, Ilocos Sur –  Agingga ita, saan pay laeng a maaklon ti pamilia ni Arceli Laoagan, 41, ti overseas Filipino worker a napapatay idiay Alberta, Canada, ti nadangkes a napasamak kenkuana, nangruna dagiti dua nga inunaan nga anakna.

Kinuna ni Ms. Violeta Laoagan, mangisursuro iti Babayoan Elementary School ken ipag ti biktima, a naapektaran unay dagiti dua nga inauna nga anak ti biktima gapu iti nadangkes a napasamak ti inada.

Nagsardeng payen da  Ryan Carlo, 20, ken ni Alvin Jay, 19, nga agbasa gapu iti trahedia a napasamak iti inada idi Enero 15 iti daytoy a tawen. Addan iti maikatlo a tawen ni Ryan Carlo iti  University of Cordillera idinto a  first year met ni Alvin Jay iti Saint Louis University idiay Baguio City.

Ubbing pay dagiti tallo a kabsatda, ni John Paulo, 10; Mark Joshua, 9; ken Marvin Victor, 8, ket dida pay maawatan ti trahedia a dimteng iti biagda.

Bayat ti interbio ti DZTP ken Tawid News iti pamilia ti biktima, adda laeng dagiti  tallo nga ubbing nga agay-ay-ayam iti paraanganda.

Maipalagip nga idi Enero 15 daytoy a tawen, naipadamag ni Arceli a  mapukpukaw ngem kalpasan ti dua nga aldaw, nasarakan ti bangkayna iti LRT station iti Calgary City, Alberta, Canada.

Dandani saan a mabigbig ti biktima gapu iti pannakalulo ti  rupana gapuen iti pannakapang-orna.

Nakasuanen iti first degree murder ti suspetsa a ni  James Watcheston, agtawen iti 21.

Kinuna ni Feliza Laoagan, katugangan ni Arceli, a nasingpet ti manugangna, saan a matagtagari, gapuna a nakigtotda idi madamagda a napapatay daytoy idiay Canada.

“Saanmi a ninamnama a mapasamak daytoy kenkuana… saan a matagtagari ni Arceli.  Nasingpet,” kinuna ni Manang Feliza.

Sakbay a nagturong idiay Canada ni Arceli, nagtrabaho kas domestic helper iti sumagmamano a tawen.

Taga-Isabela ni Arceli ngem manipud nagassawada ken ni Gregorio Laoagan, iti Babayoan a nagnaedanda agingga a napan nagtrabaho iti ballasiw-taaw.

Maikadua iti pito nga agkakabsat, uppat ti kakabsat ni Arceli nga agtrabtrabaho iti Canada.

Kinuna ni Maestra Violeta Laoagan nga iti unos iti uppat a tawen, saan a nagaw-awid ni Arceli iti Babayoan ta impilanan ti papeles ti pamiliana tapno maalana idan idiay Alberta, Canada ket  sadiayda koman nga agnaed kas imigrante.

“Addan idiay embassy ti papeles ti pamiliana, ket no maaprobaranda, agawid koman ni Arceli tapno alaenna a sangapamilia,” kinuna ti maestra.

Iti pannakaisurat daytoy, adda ni Gregorio iti Manila tapno asikasuenna ti pannakaiyawid ti bangkay ti asawana iti Sta. Cruz.#