SANTA, Ilocos Sur – Politika ti maysa kadagiti anggulo a kitkitaen dagiti inbestigador iti pannakapapatay ti maysa a nakitabla a nangabak para kapitan iti maysa a barangay ditoy nga ili.
Naituding a makibinnunot (draw lot) ni Danilo Bernido, 40, naasawaan, tapno maikeddeng ti mangabak iti kinakapitan iti Barangay Tabaculan ditoy kalpasan a nagtabla ti butosda ken ni Elvira Bagoyo, asawa ni agdama a Barangay Captain Armando Bagoyo, iti kalkalpas nga eleksion itay Oktubre 29 ngem saan a natuloy kalpasan a pinaltogan dagiti armado a tattao ni Vernido a puon ti nakatayanna. Agpada a nakagun-od iti 84 a butos da Vernido ken ni Bagoyo.
Nakaiskediul ti biktima a maki-draw lot itay Nobiembre 5 tapno maburak ti panagtabla ti butosda iti kinabalubalna ken maideklara ti mangabak a kapitan iti barangay.
Kanaig daytoy, na-refer ti kaso iti provincial prosecutor’s office ket kangrunaan a suspetsa dagiti agassawa a Bagoyo ken dua a di nainaganan a suspetsa.
Segun iti inisial nga inbestigasion ti polis ditoy, madama a makipatpatang ti biktima iti asawana, ni Catalina, iti igid ti kalsada iti pasado alas 10 iti bigat ti Nobiembre 2 idi immasideg dagiti suspek sada pinaltogan ti biktima.
Nagsagrap ti biktima iti sugat iti ulo, barukong ken brasona a puon ti dagus nga ipapatayna.
Kalibre .38 ti mapapati a naaramat iti pammapatay.
Maysa nga anggulo a kitkitaen dagiti inbestigador no adda pannakainaig ti pammapatay iti kalkalpas a barangay elections.#
