Pannakapapatay ti Vigan RTC judge, kinondenar ti IBP-Ilocos Sur

VIGAN CITY – Kinondenar dagiti abogado a kameng ti Integrated Bar of the Philip-pines, Ilocos Sur Chapter ti pannakapapatay ni Regional Trial Court Judge Reynaldo Lacasandile idinto nga indagadagda iti kapolisan ti panangiwayatda iti naing-inget nga inbestigasion para iti madagdagus a pannakasolbar ti krimen.

“Ti kayatmi…, mangiwayat ti PNP ken ti NBI iti thorough investigation to come up with a solid lead para iti pannakasolbar iti kaso,” kinuna ni IBP Ilocos Sur Chapter President Amir Chan idinto nga innayonna a nadagsen iti biangda ti pannakapapatay ni  Lacasandile nga “awan ti kalabanlabanna.”

Kinuna pay ni Chan a dakkel a pukaw ti hudikaria ti pannakapapatay ni Lacasandile a kunana a nasayaat ken simple a tao, responsible ken epektibo a hues.

Kabayatanna, nangitanggaya ti sangguniang bayan ti Tagudin iti P100,000 a gunggona iti asinoman a makaited iti impormasion para iti pannakatiliw dagiti nagisayangkat iti pannakapapatay ti RTC judge.

Kinuna met ti hepe ti polis ti Tagudin a maar-aramid ti cartographic sketch ti maysa kadagiti suspek kas maibatay iti panangiladawan dagiti kaarruba ni Lacasandile a nakakita kadagiti ganggannaet a rupa nga immar-arubayan iti balay ti biktima sakbay ti pannakapapatayna.

Mapapati a nagdamdamag dagiti di pay nabigbig a tattao mainaig ken ni Lacasandile sumagmamano a lawas sakbay ti pannakapaltogna.

Ni Lacasandile ti maikadua a biktima ti pammapatay manipud ti regional trial courts ti Vigan City.

Pinaltogan dagiti lallaki a nagkalubbon iti motorsiklo idi Disiembre 23, 2009 ni Villamor Ilmeng, legal researcher ti RTC Branch 21, bayat ti panagdaliasat ti naglugananna a traysikel iti Zone 4, Bantay, Ilocos Sur.

Awan pay ti natiliw a suspek iti nasao a krimen.

Mapapati a gun for hire dagiti pimmatay ken ni Ilmeng ken adda pakainaigan iti trabahona ti motibo ti pammapatay.#