Latest News: Pannakapapigsa ti puersa ti Ilocos Sur Bantay Kalsada Task Force | Tawid News Magazine - Weekly Ilocos News 📰

Pannakapapigsa ti puersa ti Ilocos Sur Bantay Kalsada Task Force

VIGAN CITY — Babaen iti pannakabendision ti dua a lugan ti Ilocos Sur Bantay Kalsada Task Force, mapapigsa ti puersa ti grupo a mangipatungpal kadagiti linteg ti kalsada iti probinsia.

Dagitoy a lugan ket usaren dagiti kameng ti task force a pakairamanan dagiti na-deputize a kameng kas ti Philippine National Police ti Ilocos Sur, ken Provincial Disaster Risk Reduction and Management Office.

Daytoy nga addang ti gobierno probinsial ket para masigurado ti kinatalged dagiti agdaliasat kadagiti amin a kalsada ti probinsia, kuna ni Gobernador Ryan Luis V Singson, iti pannakiuman ti lokal a media kenkuana.

Innayonna a saan a kayat ti gobierno probinsial nga adda latta inaldaw nga aksidente iti kalsada.

Impalagip met ni Mildred Elaydo, ti mangidadaulo iti Committee on Transportation ti maika-10 a Sangguniang Panlalawigan, a ti panangbantay iti kinatalged dagiti amin a kalsada ti probinsia ket trabaho dagiti amin nga agindeg, ken dagiti dumaliasat nga aggapu kadagiti sabali a lugar. Kasapulan ngarud ti pannakaadal, pannakaawat ken pannakaipatungpal dagiti linteg ti kalsada dagiti amin nga agindeg, saan laeng a dagiti drayber dagiti lugan.

Daytoy met ti imbaga ni Efren Rafanan, Sr, kameng daytoy a komite. Dagiti linteg a kas ti Children’s Safety on Motorcycle Act of 2015 wenno Republic Act No. 10666; ti Anti-Drunk and Drugged Driving Act of 2013, ti Republic Act No. 10586 a mangdusa kadagiti agmaneho ti lugan nga addada iti impluensia ti alcohol, illegal a droga ken kapadpadana, ket dua laeng kadagiti importante a linteg a mangsigurado iti pannakasaluad ti biag dagiti amin nga agdaliasat iti kalsada.

Maipalagip nga idi Agosto 22 daytoy a tawen naaramid ti pannakailunsad manen ti Bantay Kalsada Task Force sadiay Kapitolio Probinsial ditoy a siudad. Babaen iti Land Transportation Office Region 1 naipalagip manen dagiti linteg ti kalsada a masansan a masalungasing isu nga adu latta dagiti aksidente. Dagitoy ket pakairamanan ti Motorcycle Helmet Act, Seatbelt Act of 1999, Anti-Distracted Driving Act of 2016, ken Road Speed Limiter Act of 2016. ●