Pannakapardon ni Erap, maikompromiso paglintegan: Chavit

VIGAN CITY – Kinuna ni dati a Gov. Luis “Chavit” Singson a no mapardon ni napadisi a Presidente Joseph Estrada a saan a mabalud, awan serserbi ti linteg.

“No mapardon (Estrada) a di mabalud, awan serserbi diay linteg, madi nga ehemplo, saan nga agsardeng ti graft and corruption ditoy Filipinas,” kinuna ni Singson bayat ti pannakiuman kenkuana ni Jun Ramos iti programana a Barangay Commando-Brigada itay Oktubre 25.

(Naipatangatang daytoy interbio ni Jun Ramos ken ni dati a Gov. Luis “Chavit” Singson iti sakbay ti panangited ni Pres. Arroyo iti executive clemency ken ni Estrada itay Oktubre 25 Ed).

Kinuna ni Singson a “sigud nga imbagak a saan a rebbeng a mapardon ni Estrada no saanna nga isubli ti milion-milion a naalana…”

Ni Singson ti maysa kadagiti kangrunaan a testigo ti prosekusion iti plunder trial ni Estrada.

Imbutaktak ni Singson nga immaw-awat ni Estrada iti pasuksok manipud iti hueteng a mapapati a nakaipanan ti P200 milion para iti Erap Muslim Youth Foundation ken innalana ti P130 milion a bingay ti probinsia iti excise tax ti tabako.

Gapu iti butaktak ni Singson, napilaan ni Estrada ti impeachment complaint iti Kamara sa naipatulod iti Senado.

Saan a natuloy ti impeachment trial kalpasan a nag-walk-out dagiti kameng ti prosekusion gapu iti saan a panangipalubos dagiti senador a kaaliado ni Estrada a maluktan ti maikadua nga enbelop a mapapati a nakaipalaonan ti bank account ti Presidente iti nagan a Jose Velarde.

Nagprotesta dagiti tattao iti Edsa a nagtunged iti ibababa ni Estrada iti Malakaniang.

Itay Setiembre 12, sinentensiaan ti Sandiganbayan ni Estrada a mabalud iti 40 a tawen kalpasan a napaneknekan a nakabasol iti plunder.

Ngem itay Oktubre 22, inakkal ni Estrada ti apelana iti Sandiganbayan sana imbaga nga awatennan ti pardon nga ididiaya ti gobierno.

Iti panangakkalna iti apelana, agbalinen ti pangngeddeng ti korte a pinal ket maluktanen ti proseso a pannakainisiar ti pardon ni Estrada.

Ngem kinuna ni Singson a “no maaramid daydiay, kayatna a sawen, no dakdakkel ti takawem, ad-addan a makalusotka, saanka a madusdusa, idinto a dagiti babassitan a tattao, mabaludda ken dadduma pay.”

Inyunay-unay ti dati a gobernador nga “uray ania a rason, saanda nga ikumpromiso ti paglintegan ta madadael ti sistema ti hustisiatayo.”

“…Masapul a protiherentayo dayta tapno addanto pagannurotan dagiti sumarsaruno a kaputotan,” kinuna ni Singson.#