Banner News: Pannakapatalinaed ti kinagaget ken kinasalimetmet dagiti Ilokano, awis ti Kannawidan Festival | Tawid News Magazine - Weekly Ilocos News 📰

Pannakapatalinaed ti kinagaget ken kinasalimetmet dagiti Ilokano, awis ti Kannawidan Festival

VIGAN CITY – Pannakataginayon ti in-inuten a mapukpukaw a kannawidan a kinasalimetmet ken kinagaget dagiti Ilokano a nagbalin a kangrunaan a nakabigbiganda ta ammoda nga ipateg dagiti nagbannoganda.

Dayta ti nayetnag a kangrunaan nga awis ken karit kabayatan ti Nasantuan a Misa a nangirugi ti maika-13 nga Ylocos Kannawidan Festival. Naangay ti Misa sadiay St. Paul Cathedral idi malem ti Enero 28, 2020.

Ti Misa ket indauluan ni Msgr. Cosmenio Rosimo Jr., Vicar General ti Arkidiosesis ti Nueva Segovia, a nangibagi ken ni Arsobispo Marlo M. Peralta a nagatender iti Plenary Assembly ti Catholic Bishops’ Conference of the Philippines. Binayabay isuna dagiti dagiti nasurok a 30 a padi manipud kadagiti nagduduma a parokia ken institusion iti Nueva Segovia.

Indauluan met da Gov. Ryan Luis Singson, Vice Gov. Jeremias Singson, ken dagiti kameng ti Sangguniang Panlalawigan, dagiti opisial ken agserserbi iti Provincial Government, ken dagiti nagduduma a departamento ken ahensia ti nasional a gobierno, ken dagiti opisial ken pannakabagi dagiti local government units iti Ilocos Sur.

Mairaman kadagiti ahensia ti National Government a nakikaysa iti Misa ket Department of Education, Philippine National Police, Philippine Army, ken Bureau of Fire Protection. Nakikaysa pay iti Misa dagiti adda iti pribado a sektor pakairamanan dagiti agserserbi iti Palacio Arzobispado ken business sector. Dimmar-ay pay dagiti kandidata iti Saniata ti Ilocos Pageant.

Iti homilia ni Msgr. Rosimo, binigbig ken pinagyamanna ti napintas ken naindaklan a gannuat ti Provincial Government a tinawen a pannakaangay ti Kannawidan Festival tapno saan a mapukaw ket mataginayon dagiti nakainsigudan a galad, kababalin, talugading, tradision ken kultura dagiti Ilokano.

Impalagipna ti maysa a nasayaat a kannawidan dagiti Ilokano a mapukpukawen iti agdama a tiempo ket ti kinamanagsalimet wenno kinainutda iti kuarta ken kadagiti bunga ti nagbannoganda.

“Am-ammo dagiti Ilokano a na-kuripot; nainut ngem saan a naimut,” kinuna ni Msgr. Rosimo iti panangipalagipna a maysa kadagiti nasayaat a nakainsigudan a galad dagiti Ilokano ket ti kinamanagsalimetmetda.

“Ni Ilokano ket nainut ngem saan a naimut ta ipategna ti nagbannoganna ket saanna a kayat a busbosen para kadagiti banag nga awan mamaayna,” kinuna ni Msgr. Rosimo iti panangiladawanna ti nasayaat a galad dagiti Ilokano a kayatda laeng a gastosen dagiti nagling-etanda para kadagiti kangrunaan a kasapulan dagiti pamiliada.

Inlawlawagna a ti kinainut ken kinasimple ti panagbiag dagiti Ilokano ket naibatay iti pammati kas wagas ti pannakitimpuyogda iti panagbiag ni Apo Jesucristo a nagbiag a nasimple, ken inranudan ken sinerbianna dagiti napanglaw.

Inlawlawagna a dagiti Ilokano ket ammoda nga ikkan iti prioridad dagiti kangrunaan a kasapulanda, saan ketdi a panagparammag, ken ammoda met nga iburay iti sabali dagiti nagling-etanda. Impalagipna ti kannawidan dagiti Ilokano iti nagkauna a tiempo a no agrambakda iti piesta ket agsaganada amin ket pasangbayen ken pakanenda dagiti maisar-ong kadagiti pagtaenganda.

“We, Ilocanos are hard-working people, and we are found working in other places,” kinuna ni Msgr. Rosimo iti panangipadayawna iti kinagaget nga agtrabaho dagiti Ilokano. “Ngem idi dayta, idi awan pay ti 4Ps.”

Nagkakatawa dagiti nakimisa iti kinuna ni Msgr. Rosimo a napukaw ti kinagaget dagiti dadduma nga Ilokano gapu iti panagbalinda a benepisario ti Pantawid Pamilyang Pilipino Program ti National Government a mangted iti tulong kadagiti napanglaw a pamilia nga adda anakna nga agbasbasa.

“Ita a piesta ti Ilocos Sur, makipasettayo a mangtaldiap iti napalabas ti probinsia, ket dawatentayo iti Dios ta tignayenna dagiti pusotayo tapno ituloytayo dagiti nasayaat a kannawidan dagiti Ilokano para iti agdama ken sumaruno a henerasion,” kinuna ni Msgr. Rosimo iti paggibusan ti homiliana.

Kalpasan ti Misa, naaramid ti pannakaiprusision iti sentro ti siudad dagiti imahe dagiti patron ti amin a parokia, ili ken siudad iti Ilocos Sur. Nakikaysa iti prusision dagiti opisial ken agserserbi iti gobierno, ken dagiti marching bands iti nagduduma a pagadalan.

Kalpasanna, naangay ti boodle fight iti Provincial Capitol, fireworks display iti asideg ti Dancing Fountain iti Plaza Salcedo, ken Dance Craze contest sadiay Kannawidan Ground iti Tamag, Vigan City.

Kabigatanna, naituloy ti Kannawidan Festival babaen kadagiti nagduduma a pasken, pabuya, paay-ayam, pannakaipaay ti pammadayaw, panagsanay ken nagduduma nga aktibidad maipapan iti naglabas ken agdama a panawen ti probinsia a mangitan-ok kadagiti pakaseknan dagiti umili iti Ilocos Sur mainaig iti kultura, tradision, edukasion, ekonomia, agrikultura ken dadduma pay a pakaseknan dagiti Ilokano.

Naangay ti umuna a Kannawidan Ylocos Festival idi Pebrero 2008 kabayatan ti panagtakem ni Governor Deogracias Victor Savellano kas panangrambak ti anibersario ti panagbalin nga agwaywayas a probinsia ti Ilocos Sur babaen ti Royal Decree ti Ari ti España a napirmaan idi Pebrero 2, 1818. Dayta a dekreto ti nangbingay iti sigud a maymaysa a probinsia nga Ylocos. Nabukel ti Ilocos Sur ken Ilocos Norte. Naitipon iti Ilocos Sur ti paset ti La Union, Abra ken Lepanto ken Amburayan iti Mountain Province. Iti pannakaipasa ti Act 2683 idi Marso 1917 ket naikeddeng dagiti pagbeddengan ti Ilocos Sur ken kabangibangna a probinsia. ●