Footer

Pannakaprotektar ti industria ti tabako, kiddawen dagiti mannalon ken ni P’noy

VIGAN CITY – Nagmaymaysa dagiti sumurok-kumurang 1,000 tobacco farmers a mangkiddaw ken ni Pres. Benigno Simeon Aquino III iti pannakaprotektar ti industria ti tabako a pamastrekan ken mangsupsuporta iti pamiliada ken iti pannakasustener ti lokal nga ekonomia dagiti probinsia nga agmulmula iti daytoy a produkto.

Daytoy ti maysa kadagiti kangrunaan a napagnunummuanan iti Convention on Tobacco Farmers and Growers of the Philippines a naangay ditoy nga ili idi Septiembre 29.

Kinuna ni Gov. Luis “Chavit” Singson a maysa ti industria ti tabako kadagiti adigi ti ekonomia ket no mapukaw daytoy, sigurado a mapilay saan laeng a dagiti mannalon no di pay ti gobierno.

“Kasapulan ti panagtitimpuyogtayo amin tapno mapapigsa ti industria, imbes a pukawentayo daytoy,” kinuna ti gobernador.

Kanaig daytoy, kinuna ni Vice Gov. Deogracias Victor Savellano a makiuman ti hunta probinsial ditoy kadagiti hunta probinsial dagiti dadduma a tobacco producing provinces tapno mangipasada iti manipesto a maiturong ken ni Pres. Aquino a pangipeksaanda iti riknada mainaig iti Framework Convention on Tobacco Control (FCTC).

Sakbay ti konbension, nangipasa ti hunta probinsial iti resolusion a mangituding ti pannakaangay ti tobacco summit iti tinawen tapno maaddaan iti nalawag a direksion ti industria ti tabako.

Kabayatanna, impeksa ni Engr. Matthew Deong, Vice President ti Trans Manila Inc., maysa a kompania nga agnegnegosio iti tabako, ti pannakadismayana iti saan a pulos pannakonsulta dagiti adda iti tobacco industry mainaig iti proposed guidelines iti Articles 9 and 10 ti FCTC.

Insingasing ti Article 9 ti FCTC ti pannakaiwayat dagiti guidelines para iti pannakaeksamen ken pannakarukod dagiti ramen (contents) ken asuk (emissions) manipud kadagiti tobacco products ken regulasion kadagitoy a ramen ken emissions. Iti sabali a bangir, sagudayen ti Article 10 ti FCTC ti pannakaibilin kadagiti agparpartuat ken importers iti produkto ti tabako a mangipakaammo kadagiti autoridad ti gobierno dagiti impormasion maipapan kadagiti ramen ken emissions manipud kadagiti tobacco products.

“Saan nga umno a ti DOH ti mangipresentar kadatayo iti conference ti FCTC no di ket ti Department of Agriculture, National Tobacco Administration, Department of Trade and Industry ken Department of Labor and Employment gapu ta isuda ti talaga a maseknan nga ahensia,” kinuna ni Deong.

Maysa a katulagan (treaty) ti FCTC babaen ti panangendorso ti World Health Organization (WHO) a “mangprotektar kadagiti agdama ken masakbayan a henerasion iti makadidigra a resulta ti panagusar iti tabako ken pannakaitangkarang iti asuk ti tabako iti salun-at, sosial, aglawlaw ken ekonomia” babaen ti panangipatungpal kadagiti sangalubongan a pagbatayan a mangibatad iti peggad ti tabako ken pannakaipabassit ti pannakaaramatna iti amin a porma iti sangalubongan.

Nagpirma ti Pilipinas iti daytoy a katulagan idi Septiembre 23, 2003.

Maangay ti maikapat a session ti Conference of the Parties ti FCTC inton Nobiembre 15-20, 2010 iti Punta del Este, Uruguay.#