Footer

Pannakaruk-at ti pondo ti R.A. 7171, dinawat dagiti gobernador ken GMA

LAOAG CITY – Impanamnama ni Pres. Gloria Macapagal Arroyo ti madagdagus a pannakaruk-at ti pondo ti R.A. 7171 tapno maalan dagiti uppat a tobacco producing provinces ti Rehion Uno ti bingayda manipud iti excise tax ti tabako.

Daytoy ti pammatalged ti Presidente kadagiti gobernador bayat ti pribado a mitingna kadakuada iti daytoy a siudad itay Abril 10.

Kabayatan ti nasao a miting, dinawat ni Ilocos Norte Governor Michael Keon ti  pannakaipaima kadakuadan ti bingay ti probinsiada manipud iti R.A. 7171 para iti pannakayimplementar dagiti programada.

Iti interbio ni Keon iti  media kalpasan ti miting, kinunana a kasapulan unayen a maited ti bingayda iti R.A. 7171 tapno mairugida metten dagiti planoda a proyektoda para iti probinsiada.

Kinuna met ni Ilocos Sur Governor Deogracias Victor Savellano a nasolbaren ti problema ti komputasion iti bingay ti tunggal probinsia ket manamnama ti pannakaruk-at iti mabiit ti bingayda iti tobacco excise tax.

“Iti ngamin kallabes, ti volume ti locally produced a tabako ti nagbasaran ti Bureau of Internal Revenue a nangkontar iti bingay tunggal probinsia. Rumbeng koma a base iti volume ti napartuat a tabako,” panangilawlawag ti gobernador.

Sagudayen ti R.A. 7171 a maited a bingay kadagiti probinsia nga agmulmula iti Birhinia a tabako ti 15% manipud iti excise tax dagiti mapartuat a sigarilio.

Napagnunumuan pay iti nadakamat a miting ti pannakaidaras dagiti priority projects iti Region I. Karaman ditoy ti pannakapapintas ti Laoag International Airport iti Ilocos Norte, ti pannakairuar ti kanayonan a pondo para iti Banaoang Pump Irrigation Project iti Ilocos Sur ken ti pannakapasayaat dagiti Free Port Zones iti La Union ken Pangasinan.#