Pannakasaluad dagiti establisimiento iti Ilocos Sur, karit ti Provincial Government iti SP hearing

VIGAN CITY — Pannakapainget ti seguridad dagiti business and commercial establishments kontra iti pannakaserrek ken panagtakaw iti uneg ti daytoy a siudad a kabesera ti probinsia.

Dayta ti panggep dagiti kameng ti Sangguniang Panlalawigan iti Ilocos Sur iti panangisayangkatda iti hearing ken investigation in aid of legislation iti napasamak a pannakaserrek ken pannakatakaw iti business establishment a 2 Brothers Department Store Grocery iti Quezon Avenue iti daytoy a siudad. Naangay ti hearing iti Provincial Capitol idi malem ti Enero 13, 2020.

Ti hearing ket indauluan ni Vice Gov. Jeremias Singson, ken SP Member Constante Oandasan, Chairman ti Committee on Peace and Order ken dadduma pay a miembro ti Provincial Board. Nagatender met dagiti akinkukua ti naserrek ken natakawan a business establishment ken dagiti opisial a pannakabagi ti Ilocos Sur Police Provincial Office ken Vigan City Police Station, ti Provincial Legal Officer, ken dagiti maseknan a barangay chairmen ken security guards dagiti establisimiento.   

Nagpalawag dagiti maseknan a resource speakers iti hearing a nangsungbatanda kadagiti adu a saludsod dagiti kameng ti Provincial Board mainaig iti insidente a pannakaserrek ken panagtakaw dagiti armado a lallaki iti pasdek ti 2 Bothers establishment idi parbangon ti Disiembre 26, 2019, a nakaalaan iti dakkel a kantidad ti kuarta.

Naibutaktak a nagna dagiti nagtagiarmas ken nakamaskara a lallaki iti basement ti pasdek. Naduktalan nga awan ti guardia nga agbambantay iti uneg ti department store ken grocery iti rabii, ken iti laeng residensia dagiti akinkukua ti bambantayan ti maymaysa a security guard.

Impalawag met ti guardia ti Vigan Cultural and Trade Center a kaabay ti 2 Brothers Department Store a nakitana dagiti nagtagiarmas a lallaki a simrek iti establisimiento ket inyawagna iti Vigan City Police station ngem naladaw ti aksion dagiti polis.

Nangidiaya met ti akinkukua ti naserrek ken natakawan nga establisimiento iti P4 million a reward money wenno gunggona iti makaibaga ti kinasiasino dagiti suspek ken makatulong iti pannnakasolbar ti panagserrek ken panagtakaw iti establisimiento.

Impakaammo metten dagiti polis ti pannakaipatulod sadiay Camp Crame ti kopia dagiti CCTV footages tapno ma-enhanced ken makatulong iti imbestigasion para ti pannakasolbar ti krimen.

Maituloy ita a lawas iti Provincial Board ti closed door hearing wenno executive session a pagpalawagan dagiti maseknan a resource speakers tapno matulongan ti Sangguniang Panlalawigan a mangputar iti tumutop nga ordinansa para ti pannakaisayangkat dagiti gannuat tapno mapasingkedan ti seguridad dagiti establisimiento iti puseg ti Vigan City.

Kalpasan ti nagsaruno nga insidente idi parbangon ti Disiembre 26, 2019 a pannakaserrek ken panagtakaw iti uneg ti 2 Brothers establishment babaen kadagiti nagtagiarmas iti nabileg a paltog a natiliw pay ti garawda iti CCTV ti establisimiento, ken ti pannakapuor ti maysa a daan a van a mapapati a konektado iti panagtakaw iti business establishment, ken ti naginad a panagresponde dagiti polis, ket narurod ni Gov. Ryan Luis Singson gapu ta napasamak dagita a krimen iti mismo a sentro ti siudad ken asideg ti City Hall ken Provincial Capitol.

Dayta ti gapu a nangiwayat ti Provincial Board iti hearing tapno takuatenda ti pudno a napasamak ket mapagsungbat dagiti adda nagkamtudanna, ken makaaramidda iti tumutop nga ordinansa tapno saanton a maulit iti kasta a krimen iti mismo a sentro ti kabesera ti probinsia a mabigbig a World Heritage Site ken maysa kadagiti New Seven Wonder Cities of the World. ●