Footer

BANNER NEWS: Pannakasaluad dagiti Gabaldon building ti DepEd, maisaysayangkat iti Ilocos Sur

BANTAY, Ilocos Sur – Agtultuloy a pannakasaluad ken pannakamantiner dagiti Gabaldon building kadagiti public schools iti Umuna a Distrito ti Ilocos Sur kas paset ti pannakataginayon ti nabaknang a kultura ken pakasaritaan ti edukasion iti probinsia.

Dayta ti pinasingkedan ni Ilocos Sur First District Congressman Deogracias Victor “DV” Savellano kabayatan ti pannakiuman kenkuana dagiti kameng ti Ilocos Sur Integrated Press iti naangay a Kapihan iti Amianan Media Forum.

Impaganetget ni Cong. Savellano ti kinapateg dagiti Gabaldon building iti namaris a pakasaritaan ti edukasion dagiti taga-Ilocos Sur a dagitoy a pasdek a nabangon kangrunaanna kadagiti central schools iti nagduduma nga ili ken siudad idi panawen dagiti Amerikano wenno idi tiempo ti Philippine Commonwealth a dagitoy ti immuna a nagadalan dagiti nagkauna nga umili nga adu kadakuada dagiti nagballigi iti nagduduma a tay-ak ti panagbiag.

Dagiti kadaanan a Gabaldon building ti nagkauna a pasdek ti eskuela idi irugi dagiti Amerikano nga isuro ti pormal nga edukasion kadagiti Pilipino. Nagbalin dagitoy a pasdek a nakasisipan iti umuna a sursuro ken adal iti elementaria dagiti taga-Ilocos Sur a nagpangalanda iti nangatngato a tukad ti edukasion agingga iti nagturposda kadagiti propesionda. Napnuan-pakasaritaan met dagiti Gabaldon building ta adu kadakuada dagiti nausar nga evacuation centers no panawen ti didigra, ken naaramatda pay a kampo dagiti soldado a Hapon idi panawen ti Maikadua a Gubat iti Lubong.

Inlawlawagna a nasken ti pannakasaluad ken pannakapalagda dagitoy a Gabaldon building no man pay adun kadakuada dagiti madaddadael nangruna dagiti bubongan ken atepda gapu ti panaglabas dagiti adu a tawen.

Impakaammo ti Kongresista nga addan dagiti Gabaldon building a nalpasen ti pannaka-restore-na, ken agtultuloy met kadagiti dadduma a pagadalan. Impasingkedna met nga amin a Gabaldon building ket nakaprograman ti pannakatarimaanda. Kiniddawna kadagiti prinsipal, mangisursuro, nagannak ken estudiante kadagiti eskuela nga addaan iti nadadael a Gabaldon building nga urayenda laeng ti pannakaiparuar ti pondo ken implementasion ti proyekto babaen ti Department of Public Works and Highways.

Inrakurak pay ti Congressman ti agtultuloy ti panangipaay ti opisinana iti tulong kadagiti umili iti Umuna a Distrito a nadidigra iti iduduprak ni Bagyo Ompong. Impakaammona ti kaadda ti P20 Million a pondo ti gobierno a naitalek iti Nueva Segovia Consortium of Cooperatives a maipautang kadagiti mannalon nangruna dagiti agmula iti bawang.  Inawisna pay dagiti mannalon a mayat a makakiddaw ti tulong ti gobierno kas kadagiti traktor, generator ken dadduma pay a farm equipments ken kasapulan iti panagtalon ti panangbukelda ti farmers’ organization a maiparehistro iti Security and Exchange Commission, ken mangidatagda iti resolusion iti opisinana tapno maipaayanda iti tulong. Kiniddawna kadagiti mannalon ti panangtakuatda kadagiti mabalin a pamataudan iti ubbog tapno mapadur-asda a mangpasayak kadagiti kataltalonan. Impakaammona ti pannakaleppas ti proyekto iti Riverside, Brgy. An-annam, Bantay a pannakapadur-as ti irrigation system a mangpasayak kadagiti kataltalonan iti pito a barangay iti ili ti Bantay.

Impakaammona pay ti programana a pannakaisayangkat ti barangay tourism seminar a dumandanon kadagiti nagduduma a barangay tapno matakuatan ken mapadur-as dagiti aglemlemmeng a mabalin a papintasen a tourist destination tapno agprogreso ti turismo ken komersio kadagiti barangay. (Eden Alviar)

,