Footer

Pannakasaluad ti Heritage City, impanamnama ti baro a hepe ti polis

VIGAN CITY – Impanamnama ti kabarbaro a hepe ti polis ditoy siudad nga agserbi a dedikado ken  disiplinado dagiti polis iti babaenna  tapno isuda ti agbalin a modelo iti komunidad.

Impatalged daytoy ni Police Chief Inspector Maximo Taclas bayat ti ababa a panagbitlana iti turnover ceremonies a naangay itay Agosto 3 iti Vigan Culture and Trade Center ditoy.

Kalpasan ti dua tawen ken makalawas a panagtakem ni Police Supt. Maximo Torricer kas hepe ti polis ditoy, inyawatna ti puestona itay Aug. 3 ken ni Taclas, dati a hepe iti intelligence and investigation division iti provincial police office.

Ni Torricer ti mangiggem iti dati a puesto ni Taclas iti provincial police office.

Inatenderan ni City Mayor Eva Marie S. Medina, Vice Mayor Franz Ranches, dagiti city councilors a pakaibilangan da Loreto Quibilan, Henry Formoso, Lourdes Baquiran, OIC Provincial Director Police Senior Supt. Jessie Cardona, dagiti police personnel ken dagiti kakapitan ditoy siudad ti nasao a pasken.

Iti mensahe ni Torricer, inyunay-unayna ken ni Taclas nga itultuloyna ti pannakasaluad ti napintas nga imahe ti Heritage City of Vigan ken ti pannakatagiben iti urnos ken talna ditoy siudad.

Kabayatanna, nagyaman ni Cardona iti city government  ditoy gapu iti suportada iti kapolisan kangrunaanna i komunikasion, transportasion, ken armas.