Pannakasaluad ti nagun-od a panagdur-as ti rural electrification, panggep ti PHILRECA partylist

SANTO DOMINGO, Ilocos Sur – Pannakasaluad dagiti nagun-od a panagdur-as ti rural electrification babaen ti pannakaipaay ti proteksion kadagiti electric cooperatives ken dagiti members-consumers-owners tapno mapasayaat ti serbisio ti koriente kadagiti probinsia ken nasulinek a lugar.

Dayta ti panggep ti pannakabukel ti Philippine Rural Electric Cooperatives Association (PHILRECA) partylist a buklen dagiti nadumaduma a kooperatiba ti koriente iti pagilian, kas inrakurak ni Atty. Gloria Corrales, Presidente ti Board of Directors ti Ilocos Sur Electric Cooperatives (ISECO), ken maikatlo a nominee ti partylist kabayatan ti pannakiuman dagiti kameng ti Ilocos Sur Integrated Press iti naisayangkat a Kapihan iti Amianan Media Forum.

Naangay ti interview kalpasan ti panagrambak ti ISECO iti maika-45 nga anibersariona sadiay West Loch Hotel, Santo Domingo, Ilocos Sur idi rabii ti Enero 18, 2019. Naitampok iti programa ti pannakabigbig ken pannakapadayaw dagiti agpapaay ken stakeholders iti benneg ti electric services iti Ilocos Sur, a nakikaysaan dagiti agserserbi iti ISECO nga idauluan ni Engr. Egdon Sabio, General Manager, ken dagiti opisial ti nadumaduma nga electric cooperatives ken PHILRECA a da Reynaldo Villanueva ken Presley de Jesus, agpada a presidente dagiti dadakkel a kooperatiba iti Central Luzon, ken partylist nominees.

Naipakaammo iti media forum nga adu dagiti pakaseknan ti power industry a kasapulan ti suporta iti Kongreso kas ti pannakaadaptar dagiti policy a mangpalaka ti singir ti koriente kas ti pannakaikkat ti mabaybayadan a transmission fees ti elektrisidad, ken pannakaikkat ti excise tax ti coal a kaaduan a pagaron kadagiti power plants, ken ti napadaras a pannakaited ti prangkisa iti pribado a solar electric provider a mabalinna ti agipatakder iti negosio uray no sadino a lugar iti Pilipinas. Naipaganetget a ti pribado a kompania ti koriente ket negosio nga agganansia ti panggepna, saan a kas kadagiti electric cooperatives a kukua dagiti members-consumers nga addaan iti missionary work a mangidanon ti koriente kadagiti adayo a lugar uray no awan ti maganansiada ta sumagmamano laeng a balay dagiti serbianda.

Indarirag dagiti PHILRECA nominees a mayataday iti Presidential Decree No. 269 wenno Rural Electrification Act a nakaigapuan ti pannakabukel dagiti kooperatiba, rebbengen ti gobierno babaen kadagiti power cooperatives nga idanon ti serbisio ti koriente kadagiti nasulinek a lugar babaen ti Sitio Rural Electrification, ken panangipaayda iti financial assistance. Nailawlawag a saan a malmalpas ti Sitio Electrification Program ta uray no maidanonen ti koriente kadagiti adayo a sitio ket addanto manen dagiti balbalay a mapatakder kadagiti asidegna a sitio. Naidarirag a no adda dagiti naan-anay a pannakabagi dagiti electric cooperatives iti House of Representatives ket masaluadan ti panagdur-as dagiti kooperatiba ti elektrisidad ken ti interes dagiti members-consumers-owners. (Eden Alviar)