Komentario: Pannakaswaswas ti RP–US Visiting Forces Agreement | Tawid News Magazine - Weekly Ilocos News 📰

Pannakaswaswas ti RP–US Visiting Forces Agreement

PAGSAYAATAN wenno pagdaksan kadi dagiti kaaduan a Pilipino no mawaswas ti Visiting Forces Agreement (VFA) iti nagbaetan ti gobierno ti Pilipinas ken United State of America?

Nagduduma ti karirikna ken kananakem dagiti umili iti mandar ni Presidente Rodrigo Duterte iti Department of Foreign Affairs ken Department of National Defense a rugiandan ti proseso ti pannakawaswas ti VFA gapu iti rurodna iti pannakakanselar iti US Travel Visa ni Senador Ronald de la Rosa nga immuna a Philippine National Police Chief iti administrasionna.

Immuna a nagpangta ni Duterte a pawaswasna ti VFA no saan a maisubli ti US Travel Visa ni De la Rosa iti las-ud ti makabulan. Mairaman ni De la Rosa kadagiti opisial ti gobierno ti Pilipinas a nakanselar iti US visana kalpasan a pinirmaan ni US President Donald Trump ti US 2020 Annual Budget. Nairaman iti probision iti pinirmaan ni Trump ti pannakakansela dagiti opisial ti gobierno ti Pilipinas nga adda pannakainaigna iti pannakaaresto ken pannakaibalud ni Senador Leila De Lima gapu iti kaso a mainaig iti illegal a droga.  

Inakusaran idin ni De Lima dagiti adda pannakainaigna iti pannakaibaludna a da Duterte, De la Rosa, Presidential Spokesman Salvador Panelo, sigud a House Speaker Pantaleon Alvarez, sigud a House Majority Leader Rodolfo Fariñas, Rep. Rey Umali, Solicitor General Jose Calida, sigud a Justice Secretary Vitaliano Aguirre II, Public Attorney’s Office Chief Persida Acosta, Esther Margaux “Mocha” Uson, Sass Rogando Sasot, RJ Nieto, Sandra Cam ken Dante Jimenez.

Nakasuron ni Duterte iti pannakibibiang ti US iti pannakapataray ti gobierno iti Pilipinas nangruna iti kampania kontra illegal a droga. Malaksid ken ni Foreign Secretary Teodoro Locsin Jr., minandarnan dagiti kameng ti gabinetena a saanda nga agbiahe a mapan sadiay US. Pinagkedkedanna pay ti imbitasion ni Trump a dumar-ay iti Pacific and Association of South East Asian Summit sadiay US, ta boykotenna ket saanen a mangipatulod ti pannakabagina iti dayta a pasken a panagtataripnong dagiti lider dagiti nagduduma a pagilian.

Nagduduma ti reaksion dagiti kameng ti Kongreso ken dagiti nangato nga opisial ti gobierno iti desision ni Duterte a mangpawaswas ti VFA ken ti panangboykot iti imbitasion ni Trump. Adu dagiti mamati a makadakes ti addang ti Presidente iti relasion ti Pilipinas ken US ta imposible nga ibabawi ni Trump ti pinirmaanna a pannakawaswas ti US Travel Visa dagiti opisial ti gobierno ti Pilipinas nga adda pannakainaigna iti pannakaibalud ni De Lima. Pagbutnganda ti pannakaapekto ti balanse ti military power iti South East Asia ken ti seguridad ti pagilian, ken ti kasasaad dagiti minilion nga imigrante ken agtatatrabaho a Pilipino sadiay US.

Madanagan dagiti adu a Pilipino iti pannakawaswas ti VFA ta awanton ti pagbasaran ti ibibisita ken kaadda dagiti puersa ti US iti Pilipinas, ket pabor dayta iti interes ti China nga in-inuten a mangsaksakup iti paset ti teritorio ti pagilian iti West Philippine Sea wenno South China Sea. No awanton ti puersa ti US iti Pilipinas ket nawayanton ti China a mangsakup iti teritorio ti Pilipinas ket saanton a nawaya a makapagdaliasat ken makapagkalap dagiti Pilipino iti kabaybayan ti bukodda a pagilian.

Ti VFA ket maysa kadagiti katulagan iti nagbaetan ti Pilipinas ken US, kanayonan ti Mutual Defense Treaty (MDT), ken Enhanced Defense Cooperation Agreement (EDCA).

Ti VFA ket rinatipikaran ti Senado idi Mayo 27, 1999, ket ti MDT ket napirmaan idi Agosto 30, 1951 sadiay Washington, USA babaen kadagiti pannakabagi ti Pilipinas ken US.

Ti VFA ti pakaigapuan ti agtultuloy a kaadda dagiti puersa ti US iti pagilian, ken pannakaisaysayangkat dagiti bilateral military exercises. Insubli ti VFA ti kaadda dagiti puersa ti US iti Pilipinas kalpasan ti panangibasura ti Senado ti RP-US Bases Agreement idi Setiembre 16, 1991. Ti EDCA ket bunga ti VFA a pinirmaan da Philippine Defense Secretary Voltaire Gazmin ken US Ambassador to the Philippines Philip Goldberg idi Abril 28, 2014 iti Manila

Adda met dagiti pabor iti pannakawaswas ti VFA nangruna dagiti adda iti makakannigid a sektor ken dagiti kapamilia ken makisimpatia kadagiti nagbalin a biktima dagiti Amerikano a soldado kabayatan ti kaaddada iti Pilipinas. Nakabaluden ni Lance Cpl. Daniel Smith gapu iti kaso ti panagrames, ken ni Private First Class Joseph Scott Pemberton gapu iti pannakapapatay ti Pilipino a transgender a ni Jennifer Laude.

Adda met dagiti kameng ti Kongreso a saanda a kanunongan ti pannakawaswas ti VFA. Kaykayatda a mawaswas ti EDCA a mangipalubos kadagiti puersa ti US nga umay ken agtalinaed iti Pilipinas, ken mangipalubos kadakuada nga agbangon ken agoperate kadagiti pasilidad iti uneg dagiti kampo wenno base dagiti Pilipino a militar.

Nakuestionaran ti kinalehitimo ti EDCA a mailabsing daytoy iti 1987 Constitution a mangipawal ti kaadda ti foreign bases iti Pilipinas. Idi 2016, inkeddeng ti Korte Suprema a saan a maikontra iti Konstitusion.

Adda dagiti mamati a kameng ti Kongreso a gapu ta Senado ti nangaprobar iti VFA ket awan ti naan-anay a turay ti Presidente a mangwaswas iti katulagan. Mawaswas laeng ti VFA babaen met laeng kadagiti kameng ti Senado.

Iti agdama a panawen ket nagadu dagiti nadagsen a problema iti Pilipinas – dagiti agsasaruno a didigra, panagwaras ti novel coronavirus, insurhensia, riribuk sadiay Middle East a mangapektar kadagiti minilion nga Overseas Filipino Workers. Saan koma a pagbalinen ti gobierno ti Pilipinas a prioridad ti pannakawaswas ti VFA ta amangan no pataudenna pay dayta ti nakarkaro a problema iti pagilian a mangparigat iti kasasaad dagiti umili. ●