Latest News: Pannakatay ni Judge Bañez, agserbi koma nga inspirasion— pamilia | Tawid News Magazine - Weekly Ilocos News 📰

Pannakatay ni Judge Bañez, agserbi koma nga inspirasion— pamilia

SAN FERNANDO CITY, La Union — Kiddaw ti pamilia ti napapatay a Regional Trial Court Judge Mario Anacleto Bañez nga agserbi ti ipupusayna kas inspirasion tapno maitandudo ti kinapudno ken hustisia.

Kinuna daytoy dagiti kameng ti pamilia Bañez kabayatan iti misa ken pammadayaw nga insagana dagiti non-government organizations manipud iti Cordillera ken Ilocos idi Nobiembre 11 iti balay ti biktima.

“Even though he died this way, at least we know he died for a cause, for truth and justice,” kinuna ni Lumina Bañez, nanang ti pimmusay a judge.
Innayon pay ti 91-anios a Bañez a ti ipapatay ti anakna ket rumbeng a mangkarit kadagiti umili a mangbirok ti hustisia ken pannakaresolbar dagiti pammapatay, kangrunaan kadagiti kameng ti hudikatura.

Kabayatanna, kinuna met ti putotna a ni Darryl Lance a ti ayat ken respeto a linaon dagiti mensahe a maaw-awatda ti mangpalpalag-an iti sakit ken dagsen a rikriknaen ti pamilia.

“Ang iniisip ko din lang… ang tumatatak sa isip ko lang… napakahirap namang araw-araw na umiyak. Sa akin, mayroong paalaala na napakabuti niyang tao. Na minamahal siya ngayon sa parehong paraan na minahal niya ang tao, ang sambayanan,” kinuna na.

Segun kenkuana, inayat nga usto ti amana ti umili ken ti trabahona. Uray no ammona iti peggad, kuna ni Darryl a sinigurado ti huwes a patas dagiti desisionna.

“Minahal po niya ang trabaho niya hindi po siya natakot na gawin ang dapat niyang gawin… inisip niya na may iba din na pwedeng mapahamak kung hindi niya gagawin ang trabaho niya,” kunana.

“Napakalaki ng sakripisyo pero ang aking panalangin ay mas marami pang mga tao (…) na maniniwala sa hustisya, nakakatakot man ang mundo. May mga tao mang hindi naininiwala sa hustisya [dahil] naniniwala sila sa dahas… naniniwala sila sa pananakot, sa pananambang… sana mas marami pang taong tatapat doon na maniniwala sa hustisya,” kiddawna.

Maipalagip nga inyebkas ni Darryl ti kariknana iti maysa a Facebook post no sadino ket impeksana ti pammatina nga adda kainaigan ti agraraira a kultura iti pammutbuteng ken kinaranggas iti pannakapapatay iti amana.

Tinambangan dagiti saan pay mabigbig nga suspek ni Bañez idi Nob. 5 idiay Brgy. Mameltac, San Fernando City, La Union. Isuna ti presiding judge ti RTC Branch 25 idiay Tagudin, Ilocos Sur.

Segun iti report, isu ti maikainnem a huwes ken maika-43 a miembro iti Integrated Bar of the Philippines a napapatay iti agdama nga administrasion.

Iti programa, kinuna met ni Rhoda Dalang, executive director ti Center for Development Programs in the Cordillera (CDPC) a mamatida nga adda kainaigan ti trabaho ti hues iti pammaltog kenkuana.

“Mamati kami a ni judge ket napapatay gapu iti trabahona, gapu iti kina-just dagiti desisionna,” kunana.

Iti imbingayna a mensahe ti institusionda, kinunana nga adda ti dua a naisangsangayan a nakitada iti nagbalin a desision ti judge iti kaso ti kaopisinaanda a ni Rachel Mariano a pagwadan para iti dadduma pay nga adda iti hudikatura, “especially these troubling times.”

“He is impartial and just, deciding on the evidence presented and statements of the witnesses,” kuna ni dalang.

Kinunana pay a nalawag ti panangiduma ni Bañez kadagiti aktibista nga agtigtignay iti maikalintegan a wagas kas kenni Mariano kumpara kadagiti dadduma a mangar-aramat iti armas tapno lumaban iti gobierno.

“This is very striking in his decision that really inspired us,” innayunna.

Ni Mariano ti mangmanmanehar iti Community Health Education Program ti CPDC.

Idi Septiembre 4, in-dismiss ni Bañez gapu iti kaawan ti naanay nga ebidensia ti impila a kaso a murder ken frustrated murder ti 81st Infantry Battalion kontra kenni Mariano. Inakusaran ti militar ni Mariano a nakipagpaset iti napasamak nga ambush idiay Patiacan, Quirino, Ilocos Sur idi Oktubre 2017 a nakatayan ti maysa a soldado ken nakasugatan ti maysa pay.

Imbingay met ni Emmanuel Juquiana a kadua ni Bañez iti Saint Louis Credit Cooperative Board of Directors a saan laeng a ti trabaho iti korte ti pakaseknan ni Bañez. Kunana a numanpay adu ti pakakumikuman ti hues, nangipaay latta daytoy iti oras tapno tumulong iti kasapulan ti kooperatiba ken dagiti kamengda.

“Kahit Sabado at gabi ay nagmemeeting at tumutugon sa needs ng members of the cooperative. Nakapakabait sa komunidad ng less fortunate people. Siya ay tumulong despite his busy schedule,” kunana.

Kinondenar met ti munisipio ti Tadian, Mountain Province, ti ili ni Judge Bañez, ti krimen. Kasta pay a kiniddaw dagiti opisial ti ili ti dagus a pannakaipaay ti hustisia.

“Judge Mario Anacleto Marrero Bañez is a distinguished member of the municipality of Tadian. His unlawful, premeditated killing deprived our community of a living role model whose life is worthy of respect, admiration, and emulation,” kuna ti resolusion nga inruar ti munisipio. ●