Footer

Pannakauram ti Sta. Lucia police station, awan nakainaiganmi: dadaulo a militante

CANDON CITY – Boluntario a dimmatag iti korte ditoy dagiti tallo a dadaulo ti maysa a militante a grupo a masuspetsa a nairaman iti panakaraut ken panakauram ti  police station ti Sta. Lucia, Ilocos Sur.

 Dimmatag da  Julian Dawa, taga-Sta. Cruz; Leonardo Sabalo, taga-Narvacan; ken Rogelio Vilog, taga-Sta. Lucia, iti Regional Trial Court Branch 71 ditoy maigapu iti kaso a two counts of murder, robbery ken arson a nakaisaklanganda.

Kadua dagiti akusado dagiti sumagmamano a kabagian ken supportersda iti idadatagda iti korte.

Ni Atty. Robert Tudayan  ti abogado dagiti naisaklang.

Mapapati a dadaulo dagiti akusado iti StopEx,  militante a grupo a mangkitkita ken mangiruprupir iti karbengan dagiti mannalon.

Ngem segun iti report manipud  iti polis, kameng dagiti tallo iti grupo ti lokal a komunista a terorista a karaman iti panagpuor iti municipal police station iti Sta. Lucia, Ilocos Sur.

Kinuna ni Dawa bayat ti interbio kenkuana ti media a saan nga isusuko no di panangidatagda iti bagbagida iti korte ti inaramidda.

“Addaak ita ditoy tapno mangiturn-over iti bagik… idi 2003, idi na-raid (nauram) ti Santa Lucia police station, nairaman ti naganko.  Tatta, gapu ta adda harassment a mapaspasamak kaniak, isu nga i-turn-overko ti bagik tapno madalusan ti naganmi iti daytoy a kaso a nakaiyimplikaranmi,” kinuna ni Dawa.

Iti naaramid a pre-trial hearing iti korte, imbatad dagiti akusado ken ni Judge Policarpio Martinez nga awan ti nakainaiganda kadagiti nasao a kaso.

Insigida a naituding ti aldaw ti sumaruno a hearing ken panagtalinaedda pay idiay provincial jail bayat a madengdengeg dagiti nakaisaklanganda a kaso.

Kinuna ni Zaldy Alfiler, agdama a secretary general ti Stopex, a napintas ti   panagsasagadsad ti aldaw iti hearing tapno naparpartak ken naal-alisto a maammuan ti kinapudno nga inosenteda iti maipabpabasol kadakuada.

“Daytoy ti umuna pay laeng a panagdengngeg, ket saan pay a daytoy ti umiso a pannakadalus ti organisasion ken naganna, ngem no kitaentayo, maysa nga addang tapno mapagbiit ti panangtunton iti hustisia para kadakuada,” kinuna ni Alfiler.