Pannakawayawaya ni Antonio Sanchez

SAAN a rumbeng a mawayawayaan ti maysa a convicted rapist – killer a saanna a maaklon ken pagbabawian dagiti basol ken krimen a naaramidna.

Dayta ti nagkaykaysa a kapanunotan dagiti adu a Pilipino a nangipakita ti protestada iti saan a patas a pannakaipakakat ti hustisia gapu iti gannuat a nasapsapa a pannakawayawaya ni sigud a Calauan, Laguna Mayor Antonio Sanchez a nasentensiaan iti pito a bilang ti Reclusion Perpetua wenno 40 a tawen a pannakabalud gapu iti kaso a Rape – Murder ken ni Mary Eileen Sarmenta, ken Murder ken ni Allan Gomez idi Hunio 28, 1993. Aggayyem ken agpada nga estudiante iti University of the Philippines Los Baños dagiti dua a biktima.

Nagbalin a kontrobersial ti kaso idi 1993 ta adda tignay a mangiyaw-awan iti pudno nga adda iti likudan ti krimen. Immuna nga impresentar idi iti media ni Presidential Anti-Crime Commission Chairman ken Vice President Joseph Estrada ni Teofilo “Kit” Alqueza, anak ni sigud a Police Chief Supt. Dictador Alqueza nga utek iti krimen gapu iti motibo a “love triangle.”

Nagbaliw ti taray ti imbestigasion idi da Aurelio Centeno ken SPO3 Vivencio Malabanan, agpada a pasurot ni Sanchez a personal a nakakita iti krimen dagiti nagbalin nga state witness. Nagtestigoda a puersado nga innala dagiti pasurot ni Sanchez, pakairamanan dagiti dua a polis, ni Sarmenta a kaduana ni Gomez, ket inregaloda ti balasang iti Mayor a nangrames kenkuana. Kalpasanna, nagsisinnublat dagiti pasurotna a nangrames ti balasang, sada pinapatay da Sarmenta ken Gomez ken inbellengda dagiti bangkayda iti nagsina a lugar sadiay Calauan.

“A plot seemingly hatched in hell,” insurat ni sigud a Pasig Regional Trial Court Judge Harriet Demetriou idi sentensiaanna da Sanchez ken innem a pasurotna idi Marso 14, 1995 gapu iti panagrames ken pammapatay. Kadua ni Sanchez a nasentensiaan dagiti innem a pasurotna a da Luis Corcolon, Rogelio Corcolon, Pepito Kawit, Baldwin Brion, Jr., Zoilo Ama ken George Medialdea, sigud a deputy chief of police ti Calauan.

Idi Enero 25, 1999, kinanunongan ti Supreme Court ti sentensia nga inyetnag ti RTC ken ni Sanchez. Idi Agosto 29, 1999, kinedngan manen ti SC iti dua a bilang ti Reclusion Perpetua gapu iti Double Murder iti kaso ti pannakapapatay idi 1991 dagiti agama a Nelson ken Rickson Peñalosa a lider ti kalabanna iti politika. Para iti kaso da Sarmenta ken Gomez, ken dagiti agama a Peñalosa, dumanon iti 360 a tawen ti pannakabaludna.

Naklaat da Maria Clara Sarmenta ken Iluminada Gomez, nanang dagiti dua a biktima ni Sanchez idi maamuanda a mawayawayaan gapu iti pannakairamanna kadagiti nasurok nga 11,000 a benepisario ti Republic Act. No. 10592 of 2013 a nangpababa iti sentensia gapu iti Good Conduct Time Allowance.

Atapen dagiti umili a posible nga adda pannakainaigna ni Presidential Spokesman Salvador Panelo iti pannakaisapsapa ti pannakawayawaya ni Sanchez ta sigud a nagpaay a Legal Counsel ni Sanchez, ngem naglibakan dayta ni Panelo ken impaganetgetna a mayataday laeng dayta iti linteg.

Immunan nga inrakurak da Bureau of Corrections Director Rafael Faeldon ken Justice Secretary Menardo Guevarra agraman ni Senador Ronald de la Rosa, sigud a Chief ti Philippine National Police, ken BuCor Director a kualipikado ni Sanchez a mawayawayaan iti nasapsapa gapu iti nasayaat a kababalinna kas sagudayen ti RA 10592.

Nagbalin a linteg ti RA 10592 idi 2013 tapno maikkan iti gundaway dagiti nasentensiaan a balud a nasapsapa a mawayawayaan babaen ti panangipaneknekda iti nasayaat a galad, ngem dayta ket sakupenna laeng dagiti nasentensiaan kalpasan ti panagbalinna a linteg. Ngem itay Hunio 25, 2019, inkeddeng ti Korte Suprema a sakupenen ti RA 10592 dagiti nasentensiaan a mabalud sakbay ti panagbalinna a linteg idi 2013. Dayta a linteg ket saanna nga iraman a mabenepisiaran dagiti nasentensiaan gapu iti heinous crimes wenno nadagsen a krimen.

Nakaskasdaaw iti pangngeddeng ti Korte Suprema a mabenepisiaran dagiti nasentensiaan sakbay ti panagbalin a linteg ti RA 10592 gapu ti apila dagiti balud iti Bilibid, ken no kasano a nairaman ni Sanchez iti Good Conduct Time Allowance ket naduktalan idi 2006 iti kaadda ti P1.5M ti gatadna a shabu iti seldana, ken idi 2015 ket natakuatan nga agsagsagrap iti VIP treatment iti kobolna nga airconditioned ken addaan iti telebision, refrigerator ken dadduma pay nga alikamen a maipawil kadagiti balud.

Agingga ita, saan pay nga aklonen ni Sanchez nga inaramidna ti panagrames ken pammapatay kada Sarmenta ken Gomez. Iti interview kenkuana ti reporter ti ABS–CBN, impettengna a ni Alqueza ti utek ti krimen, ken nailandek laeng gapu kadagiti kalabanna iti politika, ket nagsagaba isuna iti pagbaludan iti basol a saanna nga inaramid. Ipakita dayta iti saanna a panagbabawi iti basolna.

Nagtimek metten ni sigud a Justice Demetriou a nangsentensia ken ni Sanchez ket imbilangna a “mockery of justice” ti gannuat a nasapsapa a pannakawayawaya ti kombiktado a killer–rapist. Impudnona a naidiayaan iti P30 M idi mabisbista ti kaso ni Sanchez tapno maabsuelto ti sigud a mayor.

Iti sango ti nabara a protesta da Mrs. Sarmenta ken Mrs. Gomez ken dagiti umili, impasingkeden ni Presidente Rodrigo Duterte a saanna a wayawayaan ni Sanchez. Nasuspender metten ti pannakaipakat ti Good Conduct Time Allowance tapno maarisit a nasayaat a dagiti laeng kualipikado dagiti nasapsapa a mawayawayaan. Mangisayangkat metten ti Senado iti imbestigasion iti kaso ni Sanchez tapno mapatibker ti linteg ket saan a mairaman a mabenepisiaran dagiti nakaaramid iti nakaam-ames a krimen. Ngem kasanon dagiti nawayawayaanen a balud a saan a kualipikado?●