Pannakayendorso ken panagkampania dagiti kandidato iti Senado

PANANGIYENDORSO dagiti nalatak wenno prominente a tattao, panangtratar kadagiti kangrunaan nga isyu a pakaseknan dagiti umili wenno panagkanta, panagsala ken panagpatpakatawa dagiti kandidato a para senador iti imatang iti publiko iti kasamayan a wagas ti panagkampania tapno itandudo ida dagiti botante inton Mayo 13, 2019?

Kangitingiten ti kampania dagiti kandidato a para senador ken partylist representatives. Makumikomen dagiti agngayangay iti Senado nga agkampania kadagiti nagduduma a lugar iti Pilipinas nangruna kadagiti siudad ken probinsia nga addaan iti adu a botante.

Kalaksidan kadagiti adu a political advertisements iti radio, telebision ken social media, addan dagiti election media forum nga isaysayangkat dagiti daddakkel a network tapno adda lugar a pakaammuan kadagiti plataporma dagiti kandidato ken pangilawlawaganda kadagiti pagtaktakderan ken kapanunotanda maipapan kadagiti nagduduma nga isyu pakaseknan ti biag dagiti umili.

Agsasaruno metten dagiti partido iti politika ken grupo dagiti kandidato a mangisayangkat kadagiti political rallies ken panagbisita kadagiti nagduduma a lugar tapno maam-ammo ida dagiti botante. Gapu iti kalawa ti Pilipinas a pagkampaniaanda, limitado laeng dagiti panawenda nga agpasiar kadagiti probinsia, ket kaaduanna nga agpatinggada laeng kadagiti kabesera, ken gundawayanda ti dumar-ay kadagiti maangay a naindaklan a pasken.

Iti agdama a wagas ti kampania, adu kadagiti kandidato ken grupo ti agpannuray iti panangiyendorso kadakuada dagiti nalatak a lider ti Pilipinas. Dagiti kandidato a kameng ti Partido Demokratiko ng Pilipinas – Lakas ng Bayan (PDP Laban) ket agpannurayda iti panangiyendorso ni Presidente Rodrigo Duterte. Sabali pay ti grupo nga idurduron ni Presidential daughter ken Davao City Mayor Sarah Duterte ti regional party a Hugpong Ng Pagbabago ta adda dagiti iyen-endorsona a kandidato a saan a mairaman iti PDP Laban a partido ti amana.

Napinget met ti panangiyendorso ni Vice President Leni Robredo kadagiti walo a kandidato ti oposision a maawagan iti Otso Deretso. Naggapu dagitoy a kandidato iti Liberal Party ken dadduma pay a partido iti oposision.

Napaneknekanen ti kinapateg kadagiti kandidato ti endorso dagiti prominente a political leaders kas ti Presidente ken Bise Presidente ti Pilipinas gapu ta kas tinalek ken intandudo dagiti adu nga umili ket makaallukoyda met iti adu a botante a mangbotos iti supsuportaranda a kandidato.

Napateg met ti panangiyendorso dagiti mararaem nga artista wenno showbiz personalities kadagiti kandidato gapu ta saan a mailibak ti napigsa nga impluensiada kadagiti umili, kas ipaneknek dagiti adun a mangab-abak nga artista iti salisal ti politika iti nasional man wenno lokal a posision. Dayta ti gapu nga uray kadagiti political rallies ket adda latta dagiti maikuykuyog a boluntario wenno matangdanan nga artista a mangawis kadagiti agbuya ken mangikampania kadagiti kandidato. Dayta pay ti gapu nga adu dagiti kandidato nga imbes nga ilawlawagda dagiti platapormada kadagiti political rallies ket kaykayatdan ti agkanta, agsala wenno agpatpakatawa tapno agparangda a kasla artista ken mailemmengda ti kinakurang ti ammoda.

Importante met ti panangiyendorso dagiti lider ti relihion wenno pammati kadagiti mapilida a kandidato. Isu nga adu a kandidato dagiti mapmapan agkurno kadagiti lider iti relihion tapno magun-odda ti pamendisionda ken panangiyendorsoda kadakuada. Maysa a nabileg a sekta ti pammati nga addaan iti million ti bilangna a kameng ti nabayagen a mabigbig iti sangsangkamaysa a panagbotosda kadagiti maipaulog a kandidato iti amin a posision manipud ngato agpatingga iti kababaan a puesto. Ngem addan dagiti naglabas nga eleksion a naabak met dagiti kandidato a sinuportaran daytoy a sekta ti pammati.

No man pay saan a mangiyen-endorso dagiti obispo ken papadi ti Simbaan Katolika kadagiti kandidato, ta maikkan iti wayawaya dagiti Katoliko nga agpili kadagiti kayatda a butosan, ngem adda dagiti lay leaders wenno laygo a mangidaulo kadagiti gunglo iti salinong ti Iglesia Katolika nga as-asitgan dagiti kandidato a mangiyendorso kadakuada a maibilang a dakkel ti naitulongda iti panagballigi dagiti sinuportaranda a kandidato.

Tagtagilag-anen man dagiti dadduma a politiko ken kandidato ti impluensia dagiti dadaulo ti Simbaan Katolika ngem napaneknekanen ti kinapateg ti panangiyendorso dagiti lay leaders ta adun dagiti nagballigi a politiko a sinuportaranda. Dayta ti gapu a kimmambio dagiti lider iti pagilian iti panangat-atakarda kadagiti mangidaulo ti Simbaan ta agamakda a maapektaran ti botos dagiti iyen-endorsoda a kandidato.

Saan nga amin nga iyendorso dagiti lider ti gobierno ken relihion ken dagiti artista ken dadduma pay a nalatak a tattao ket nasayaatda a kandidato. Kadagiti para senador iti masungad nga eleksion, adu kadakuada dagiti awanan iti naan-anay a kabaelan ken namantiaanen dagiti kinataoda iti nakaro a kurapsion, ngem mapagparangda a nadalus ken nasayaat nga agserbi. Mapaspasamak dayta ta dagiti mangiyen-endorso kadagiti kandidato ket addaanda met iti managimbubukod nga interes wenno agbaybayadda laeng iti utang a naimbag a nakem uray no ammoda a saan a maikari ti ikamkampaniada a kandidato.

Napateg kadagiti politiko ti panangiyendorso dagiti prominente ken nalatak a tattao kadagiti mapilida a kandidato. Ngem saan koma a dayta ti kangrunaan a pagbasaran dagiti botante iti panagikeddengda iti butosanda, no di ket usarenda iti bukodda a panunot iti panangamirisda iti integridad ken kabaelan dagiti kandidato, ken surotenda ti timek ti konsensiada tapno maarisit dagiti maibaon iti Senado. (Eden Alviar)