Pannakiboksing ni Pacquiao, nagbakasion ti krimen iti probinsia

VIGAN CITY – Nakadaldalus ti police record iti kaaldawan ti panagboksing da Manny Pacquiao ken ni WBC Super Featherweight Champion Juan Manuel Marquez iti Mandalay Bay Events Center iti Las Vegas itay Marso 15 (Marso 16, Manila time).

Naammuan manipud iti provincial police office ditoy nga awan ti naireport nga aniaman a krimen iti las-ud ti 24 oras iti kaaldawan ti rematch da Pacquiao ken ni   Marquez.

Ngem adu nga apisionado iti boksing ti saan a napnek iti resulta ti panagsango manen dagiti dua a malalaki a boksingero.

Nupay inagaw ni Pacquiao ti korona ni Marquez ngem babaen ti split decision.

Tinumba ni Pacquiao ni Marquez iti maikatlo a round babaen ti makaulaw a left hook, ngem nakalasat ti boksingero a Mehikano ket adu ti naipatamana a disnog a nagsarsarapaan ti Filipino a boxer kadagiti simmarsaruno a rikos.

Sumagmamano a boxing analysts ditoy pagilian ti nagkuna a naabak ni Pacquiao ta iti bukodda nga scorecard, rimmabaw ni Marquez iti maudi a round.

Kalpasan ti maika-11 a rikos, di masigurado ti mangabak agsipud iti karisiris ti rupak dagiti dua a boksingero.

Kas kadagiti kailianda iti nadumaduma a paset ti pagilian, alas dies pay laeng, naggaarimutongen dagiti residente ditoy probinsia iti sango ti telebision ket nagbuyada iti panagboksing manen ti Pambansang Kamao ken ti idolo dagiti Mehikano kalpasan ti panagrupakda idi kanikapat a tawen.

Iti immuna a panagsangoda, iti baet ti namitlo a panangtumba ni Pacquiao ken ni Marquez iti umuna a rikos, nakalasat daytoy ket nakasubbot kadagiti maud-udi a rikos a nagtungpal iti draw.

Inannugot ti maysa a judge a nagriro  ta imbes a 10-6 koma ti score gapu iti pannakatumba ni Marquez iti namitlo a daras iti umuna a round, 10-7 ti indatagna a nagtungpal iti desision a draw .

Ngem iti maikadua a panagsangoda, nupay nanabtuog naminsan ni Marquez iti maikatlo a rikus, nagbalin a risiris ti rupak ket di maitudo ti mangabak kalpasan ti maudi a round.

Ngem iti pannakasuma ti scorecard dagiti judges, naideklara a nangabak ni Pacquiao babaen ti split decision ket inagawna ti korona ni Marquez.

Impetteng ni Marquez a nangabak iti panagrupakda ken ni Pacquiao ket kinaritna ti baro a kampeon iti rematch.

Ngem sakbay ti yuulina iti ring, impakdaar ni Pacquiao a daytoy ti maudi a pannakiboksingna iti super featherweight division ta agpangato iti lightweight division ket manamnama ti panangkaritna ken ni kampeon David Diaz.#