Pantawid text scam, naibulgar

BAGUIO CITY – Nakaawatkayo kadin iti text message a nangabakkayo iti premio iti maysa a raffle ti Pantawid Pamilyang Pilipino Program (4Ps)?
Kinuna ti Department of Social Welfare and Development nga agraraira ti text manipud iti President Noynoy Aquino Foundation a mangited iti cash prizes babaen ti 4Ps kadagiti agus-usar iti selpon.

Imballaag ni DSWD Cordillera Regional Director Janet P. Amas iti publiko a saanda nga italtalek daytoy agsipud ta maysa a panangloko wenno scam.

Kinuna ni Amas a saan a mangang-angay iti raffle promos ti DSWD ket indagadagna iti publiko ti panangireportda iti aniaman a maikaniwas nga aramid pakaseknan iti 4Ps babaen ti Grievance Redress System.

Ipatulod ti complaint wenno report babaen ti text message iti 0918-912-2813 wenno agpulong iti municipal, provincial, or regional Social Welfare and Development offices.#