VIGAN CITY – Kinuna ni Barangay Captain Larry Raboy a dakkel a pakaidayawan ti Barangay Pantay Fatima ti pannakapilina a kas Most Child-Friendly Barangay ti Siglat Awards bayat ti pannakaselebrar ti Kannawidan Ylocos Festival idi bulan ti Pebrero.
Daytoy ti maikatlo a daras nga inyalat ti Barangay Pantay Fatima ti nasao a pammadayaw.
Kas grandslam winner, immawat ti barangay iti plake ken P50,000.00 a cash award iti seremonia a naangay iti Quirino Stadium idi Pebrero 3.
Segun ken ni Raboy, nagun-odda ti pammadayaw kas Most Child-Friendly Barangay gapu kadagiti programana a mangitag-ay kadagiti ubbing babaen ti suporta ti gobierno ti siudad nga idadauluan ni Mayor Eva Marie S. Medina.
Maysa kadagiti nangitag-ay iti Barangay Pantay Fatima ti pannakabuangay ti maysa a rondalla dagiti ubbing.
Nagun-od pay ti Barangay Pantay Fatima ti maikadua a gunggona kas Best Solid Waste Implementer, ngimmato iti maysa a pangal manipud iti maikatlo a gunggona idi 2012.#