Footer

Panueldo dagiti empleado, nahold-ap

QUIRINO, Ilocos Sur – Naliday ti baro a tawen dagiti empleado ti munisipio ditoy kalpasan a sinaneb dagiti armado a tattao idi sardam ti Disiembre 26 ti nagluganan ti tesorero ket kinasakasda ti panueldo nga inruarna manipud iti bangko .

Sinaneb dagiti armado a lallaki ti Mitsubishi Pajero a nagluganan dagiti empleado ti munisipio ti Quirino a pakaibilangan da Alejandro Sevilla y Galut, 54, tesorero ti munisipio; Lilia Luisa Sevilla y Gallao, 54, naasawaan, municipal social welfare and development office; Erwin Bautista y Abejon, 34, naasawaan, utility worker; ken Leonardo Betonio y Abejon, 26, baro, clerk, agpapadada amin a residente iti Barangay Poblacion ti nasao nga ili ket  kinasakasda ti P1,980,750.00 a para iti extra bonus dagiti empleado, agraman dagiti petaka, selpon, ken ti lisensiado a cal. 9mm ti drayber.

Segun iti inisial nga inbestigasion dagiti polis, bayat ti panagdaliasat ti Mitshubishi Pajero a minaneho ni Alejandro Sevilla iti Sitio Baybayatin, kellaat a nagparang manipud iti bakras dagiti armado a grupo ti lallaki a nagtagiarmas ket pinasardengda ti lugan,   indeklara ti hold-ap, sada ginuyod nga inruar dagiti naglugan ken innala dagiti petaka ken selponda, ken ti P1,980,750.00 a para iti extra bonus dagiti empleado ti munisipio agraman ti paltog ti drayber.

Mapapati nga inulod pay dagiti di nabigbig a suspek dagiti biktima agingga iti salogan.

Bayat ti pannakaulodda, nakataray ni Betonio ket naglemmeng agingga iti naglibas dagiti suspek iti saan nga ammo a direksion.

Segun iti polis, naglugan ni Betonio iti maysa a limmabas a dyipni sana inreport ti napasamak iti polis.

Nagresponde dagiti polis ket nangiwayatda iti manhunt operation maikontra kadagiti naghold-ap ngem saandan a nakita pay dagitoy.

Daytoy ti umuna a gundaway nga adda nahold-ap a lugan iti daytoy nga ili.#