Paoay, napili a most competitive town

LAOAG CITY – Ti ili a Paoay ti nangiyalat iti pammadayaw a most competitive town iti 3rd agingga iti 6th class municipality category.

Kanaig daytoy, dinayaw ni Gov. Imee Marcos dagiti agtuturay iti Paoay gapu iti pannakapili daytoy nga ili a most competitive municipality kadagiti nagsasalip a 3rd to 6th class municipalities.

Ni Marcos ti nangirubbuat iti “Paoay Kumakaway” a pangidur-as iti turismo iti daytoy nga ili idi 2012.

Madakamat ditoy a nakalista a Heritage Site iti UNESCO ti Saint Agustin Church ken nagbalinen a tourist attraction dagiti sumagmamano a lugar ditoy kas iti Paoay Lake ken ti sand dunes a nakasiutingan dagiti nalatak a pelikula a pakaibilangan ti Ang Panday a nagbidaan daydi Fernando Poe Jr., ken ti Himala ni Nora Aunor.

Initiatibo ti National Competitiveness Council, kangrunaan a panggep daytoy a programa ti pannakaidur-as ti pannakibalubal ti pagilian babaen iti panagkikinnamayet a tignay iti nagbaetan ti nasional ken lokal nga ahensia ti gobierno, ti publiko ken dagiti pribado a sektor.

Kinuna met ni Paoay Mayor Dolores Clemente a nagbunga met laengen dagiti sakripisioda nga agtuturay ditoy nga ili a mangital-o iti nasayaat a panangituray.#