Footer

Papadi, polis, NGOs, nagrali para urnos ken talna iti Amianan a Luzon

SAN FERNANDO CITY – Maysa a peace rally ti naangay ditoy a nangidarirag iti pannakaisardeng ti kinadamsak ken pammapatay kadagiti probinsia iti Amianan ken iti sapasap a pagilian.

Indagadag  dagiti uppat  nga obispo iti Amianan a Luzon, aganay 30 a papadi manipud kadagiti nadumaduma a parisio iti Ilocos ken Cordillera regions, dagiti polis ken non-government organizations kabayatan ti peace rally ti pannakapasardeng koman dagiti  kinadamsak ken pammapatay kadagiti nadumaduma a probinsia iti Amianan a Luzon ken iti pagilian.

Karaman kadagiti nakondenar bayat ti rali ti pannakapapatay da  Fr. Francis Madhu ti Labuagan, Kalinga; Fr. Florante Rigonan ti Pinili, Ilocos Norte; ken sumagmamano a political killings iti Abra, La Union, Pangasinan, Ilocos Norte and Ilocos Sur.

Malaksid kada Bishops Artemio Rillera ti La Union, Leopoldo Jeaucian ti Abra, Ernesto Salgado ti Vigan and Jacinto Jose ti Urdaneta, aganay sangaribu a ralista ti timmipon iti nasao a rali a pakairamanan dagiti papadi, parishioners, estudiante, polis ken pannakabagi dagiti nadumaduma a religous groups ken ti  Volunteers Against Crime and Corruption (VACC) nga indauluan ni  Chairman Dante Jimenez.

Nakipartisipante pay iti nasao a rali da dati a  Colonel Bobby Ortega a nangibagi ken ni Gov. Manuel Ortega, La Union Police Provincial Director Sr. Supt. Franklin Bucayu ken dagiti  pastor manipud iti United Church of Christ in the Philippines.

Kabayatanna, kinuna Police Chief Superintendent Leopoldo Bataoil, PNP regional director, bayat ti programa iti   St. William Cathedral, a nasolbaren ti pannakapapatay ni Mayor Julian Resuello ti San Carlos City ken ni Philip Velasco ti Bacarra, Ilocos Norte babaen ti  Task Force Usig a nabuangay para iti pannakasolbar dagiti politikal a pammapatay.

 “Ar-aramidenmi amin a kabaelanmi para iti urnos ken talna. Ngem adda dagiti tattao nga addaan iti bukod nga interes a pumatay kadagiti inosente a tattao tapno laeng addada iti poder. Tulonganyo dagiti polis agsipud ta dimi maaramid a dakdakami. Kayatmi nga ipatalged a rumimbaw ti turay ti linteg (We are doing everything for peace and order. However, there are people with self interest who even kill innocent persons so they can be in power. Help your policemen because we cannot do it alone. We want to ensure that the rule of law will prevail),” kinuna ni Bataoil..

Inorganisa ti Society of the Divine Word (SVD-Northern province) ti nasao a peace rally kas paset iti panangselebrarna iti sentenariona inton umay a tawen a kangrunaan a panggepna ti pannakaidagadag iti kappia iti pagilian ken iti pannakakondenar dagiti nadumaduma a kita ti krimen ken korapsion.#