Paperless session, naisingasing

CABUGAO, Ilocos Sur – Maiyussuat ti paperless session para iti nasaysayud a pannakatratar dagiti naikalendario a business iti sangguniang bayan ditoy.

Segun ken ni Konsehal Benedict Savellano, autor iti nasao a proposal, tunggal konsehal ket maikkan iti laptop nga aramatenna bayat ti session a pangadal ken panangsukimat kadagiti ordinansa, resolusion wenno gakat a naidatag iti sangguniang bayan para iti pannakatratarda.

Manamnama ti pannakaanamong ti nasao a singasing kalpasan nga impasingked ni Mayor Edgar Cobangbang a suportaranna iti pannakaisayangkat iti paperless session iti sangguniang bayan.#