Para iti pannakaidur-as pay ti turismo, pilgrimage tourism, maitandudo: Gob. DV

CABUGAO, Ilocos Sur – Kinuna ni Gov. Deogracias Victor “DV” Savellano a paset ti programa ti gobierno probinsial ti pannakaidur-as ti pilgrimage tourism iti Ilocos Sur tapno ad-adu pay ti maawis a turista iti probinsia.

Kanaig daytoy, impresenta ni Savellano kadagiti 50 a papadi iti Diocese of Cubao sadiay Quezon City dagiti pilgrimage churches ditoy Ilocos Sur kas paset ti agtultuloy a programana a pannakaidur-as iti turismo.

Walo dagiti simbaan a sakawen ti pilgrimage tourism a pakairamanan ti St. Paul Metropolitan Cathedral ken Bassit a Simbaan (Vigan City) Sta Maria Church (Sta.Maria), St. Lucy Church (Sta. Lucia), St. Augustine Church (Bantay), St. William  the Hermit Church (Magsingal), San Vicente Ferrer (San Vicente), San Nicholas Tolentino (Sinait) ken St. John the Baptist (Badoc, Ilocos Norte).

Nairaman ti Badoc maigapu ta agkasilpo ti pakasaritaanda iti simbaan ti Sinait, Ilocos Sur.                

Kinuna ni Savellano nga addaan naisangsangayan a pakasaritaan  dagitoy a simbaan a pakasarakan kadagiti milagroso nga imahen iti pammati dagiti katoliko.

Iti St. Paul Metropolitan ken Bassit a Simbaan ti ayan ni Sto.Cristo Milagroso a kangrunaan a daydaywen dagiti turista a bumisita iti Vigan; iti Simbaan ni Sta. Lucia ti mabigbig a pagkararagan dagiti addaan ananayen iti mata; ti Our Lady of Assumption a masarakan iti simbaan ti Sta Maria, nailista a maysa kadagiti baroque churches iti Pilipinas a nailista iti Unesco World Heritage, ti bisbisitaen dagiti deboto ni Mama Mary; iti simbaan ti  Sinait ti ayan ti Sanktuario ni  Sto. Cristo Milagroso a kangrunaan a daydaywen dagiti deboto iti aldaw ti Biyernes; kanaig iti pakasaritaan daytoy ti Virgen ti Badoc; Ni Apo Caridad, patron ti ili a Bantay, ti  bisbisitaen dagiti deboto ni Virgen Milagrosa. Nalatak pay ti torre ti nasao nga ili.

Kinuna  ni Savellano a makita koma dagiti kaprobinsiaanna ti kinapateg dagiti nadakamat a pilgrimage churches idinto nga indagadagna a dagitoy koma ti umuna a bisitaenda.

Kaadduan a daydaywen dagiti deboto ti Our Lady of Piat sadiay Cagayan ken ti Our Lady of Manaoag sadiay Pangasinan.

Immun-unan nga inkampania ni Savellano ti domestic tourism kas iti pannakaital-o dagiti local products, native crafts, ken delicacies babaen ti "one town, one product program ken ti pannakapapintas iti Bessang ken Tirad Pass kas paset ti eco-tourism program ti probinsia. #