Footer

Para pallot a manok, natakaw

CANDON CITY.  Dua a manok a para pallot ti natakaw iti maysa a farm iti barangay Calaoan, ditoy siudad ket kangrunaan a suspetsa ti trainer.

Nagreport iti polis ni Oscar Manuel, caretaker ti Acal’s Farm, kalpasan a natakuatanna a natakaw ti dua a para tadi a manok idi mapanna bisitaen dagitoy.

Segun ken ni Manuel, aggatad dagiti natakaw a manok iti P24,000.

Suspetsaan ni Manuel nga intaray ti maysa a Rey Sandoval, trainer iti nasao a farm, dagiti manok agsipud ta kellaat a nagpukaw daytoy ket pati dagiti aruatenna ket awanen.

Iti sabali a damag, natiliwan ti maysa a balasang a mangilibas iti tagilako iti maysa a department store ditoy .

Nasiputan ni Jonabelle Abalos, saleslady, ni Melody Jornacion, 22, ken residente iti barangay Baluarte, Salcedo, Ilocos Sur a mangilibas kadagiti tagilako iti Jezzi’s Enterprise ket sinitarna daytoy.

Nasukalan iti ikut ti balasang ti maysa a lotion extract, deodorant, 2 a bracelet, 1 a kuentas, headband, 2 a nail polish, aritos, 3 a singsing ken eye brow nga aggatad amin iti P3,000.

Nasiputan ti saleslady ti suspetsa a mangikabkabil kadagiti tagilako iti pantalonna.

Naimbitaran ti suspetsa iti kuerpo iti pulisia ngem napalubosan met laeng kalpasan a nagbayad iti P160 ken inkolateralna ti cellphonena.#