Parokiano ti beerhouse, napaltogan

STA. LUCIA, Ilocos Sur – Maysa a lalaki a nangpadas a mangpakalma iti padana a parokiano iti pannakiririna ti napaltogan a puon ti nakayospitalanna.

Segun iti report iti polis ditoy, napan imminom iti maysa a videoke bar da Pablisito Galcon, baro, mannalon, residente iti Pila East ditoy nga ili ken maysa a kaduana ngem rimmuar ti biktima ket simrek iti sabali a videoke bar nga asideg laeng ti paggiinomanda.

Nadatnganna ti suspetsa, ni Jeffrey Habon, residente ti Barangabong ditoy met laeng nga ili, a makirirriri iti maysa a GRO.

Mapapati a rimmuar ti suspetsa ket napanna innala ti paltogna. Sinurot ti biktima ket inanawana daytoy ngem gimluong ti paltog ket napuntaan ti kanawan a siket ti biktima.

Intaray ti suspetsa ti biktima iti Candon City Hospital sa naglibas.#