Partidor, nakasuan

SANTA, Ilocos Sur – Nakasuan ti maysa a partidor gapu iti panangkugtarna iti maysa a polis a nagresponde tapno aganawa iti riri idi bigat ti Marso 20.

Nakasuan ni Allan Alvior y Docel, 29, naasawaan, ken residente iti Barangay Labut Norte, Santa, Ilocos Sur iti direct assault upon an agent of person in authority ket nagdalanen daytoy iti inquest proceedings iti Ilocos Sur Provincial Prosecutor’s Office ken naibilin ti pannakadetenerna iti pagbaludan ti probinsia babaen ti commitment order nga inyisio ni Judge Gina Juan Chan ti RTC Branch 22, Narvacan, Ilocos Sur.

Maipalagip a nagriri da Avior ken Nelson Balallo y Salayog, 24, baro, personnel ti Franks Burger, ket nagresponde da SPO4 Esteban Torrano y Pira, 46, PNP member a nakaassigned iti Santa Police Station ngem kinugtaran ni Avior ti makannigid a sakana.

Nairekomenda nga agpiansa ni Avior iti P12,000.00 para iti temporario a wayawayana.#