STA. CRUZ, Ilocos Sur – Nasarakan ti bagi ti maysa a partidor a tumtumpaw iti waig sadiay Barangay Botobot, Sta. Cruz, a mapapati a nalmes gapu iti bartekna.
Inreport ni Michael Bustillos y Baldea iti polis a nasukalan a tumtumpaw iti waig ti bangkay ni Eduardo Bustillos y Concepcion, 39, naasawaan, partidor ken residente iti Barangay Suyo ditoy nga ili.
Segun ken ni Maritess, 31, asawa ni Bustillos, idi agarup 5:00 ti malem ti Disiembre 9, adda nakakita ken ni lakayna nga adda iti inpluensia ti arak a nakabisikleta nga agturong iti Barangay Pilar ket saan a naggawid iti sumuno nga aldaw.
Idi agarup alas 6:00 ti malem, napan kinita ni Maritess ti dua a bakada iti Barangay Botobot ket nakitana ti bisikleta ti asawana a naiparking iti rangtay.
Natakuatanna laengen ti asawana a tumtumpaw iti waig.
Mapapati a nalmes ti biktima gapu ta awan ti makita dagiti polis a pagilasinan iti foul play iti pannakatayna.#